Lyra McKee
Lyra Catherine McKee ['lɪərə mə'ki:] (* 31 Maart 1990, † 18 April 2019) was 'n Noord-Ierse joernalis wat bekendheid verwerf het met haar werk oor die maatskaplike gevolge van die onluste wat Noord-Ierland dekades lank geteister het. Naas hierdie bydraes, wat in 'n verskeidenheid publikasies verskyn het, was sy ook werksaam as redakteur vir Mediagazer, 'n nuusvoer-webblad.
_(cropped).jpg)
Op 18 April 2019 is Lyra McKee, wat in 'n Rooms-Katolieke familie in Belfast gebore is, gedurende onluste in die Creggan-buurt van Derry, Noord-Ierland per ongeluk deur 'n koeël getref wat deur lede van die Nuwe Ierse Republikeinse Leër afgevuur is en noodlottig gewond. Haar begrafnisdiens in die Anglikaanse Sint Anna-katedraal te Belfast op 24 April is bygewoon deur die Ierse president Michael D. Higgins, die eerste ministers van die Verenigde Koninkryk en die Republiek Ierland, Theresa May en Leo Varadkar, die leier van die amptelike opposisie, Jeremy Corbyn, en leidende Noord-Ierse politici soos Arlene Foster (DUP), Mary Lou McDonald en Michelle O'Neill (albei Sinn Féin).[1]
Lyra McKee se ma Joan Lawrie is op 10 Maart 2020 in 'n hospitaal te Belfast oorlede. Volgens persberigte het haar gesondheidstoestand ná die moord op haar dogter versleg.[2]
Verwysings wysig
- ↑ Belfast Telegraph Digital, 24 April 2019: 'Why did it take Lyra McKee's murder to bring politicians together?' Fr Martin Magill challenges NI leaders attending funeral. Besoek op 11 Maart 2020
- ↑ Belfast Telegraph Digital, 11 Maart 2020: Lyra McKee's heartbroken mum Joan dies ahead of first anniversary of daughter's murder. Besoek op 11 Maart 2020