Manifes vir Europese Sekuriteit
Die Manifes vir Europese Sekuriteit is ’n ooreenkoms wat in 1999, tydens die sesde beraad van die Organisasie vir Veiligheid en Samewerking in Europa (OVSE) in Istanboel, Turkye onderteken is. Die beraad is tussen 18 en 19 November gehou en deur 44 nasies, insluitend die Verengide State en Russiese Federasie, onderteken.[1]
Volgens die OVSE het die manifes ten doel om die organisasie se vermoë te versterk om konflikte te beperk, te beredder en samelewings wat deur oorlog geteister word, te rehabiliteer.[2] Die organisasie se lidlande het onderneem om hom by te staan met die handhawing van vrede, deur middel van vredesmagte.[2] Die ondertekenaars van die manifes het ook onderneem om konflikte in die OVSE se jurisdiksie te voorkom en bestaande konflik vreedsaam op te los.[2]
In wese het die manifes die nuwe risiko’s en uitdagings vir die Europese vasteland ná die Koue Oorloog onder die loep geneem. Dit dek internasionale terrorisme, gewelddadige ekstremisme, georganiseerde misdaad, dwelmhandel, die verspreiding van klein en ligte wapens, akute ekonomiese probleme, die aftakeling van die natuurlike omgewing en die onstabilitieit in die Middelandse See-streek en Sentraal-Asië.[3]
Die manifes is onderteken te midde van die Tweede Tsjetsjniese oorlog waartydens die Russiese federasie ekstremistiese elemente in dié deelstaat beveg het.[4]