Mansion House, Londen

Mansion House is die ampswoning en kantoorgebou van die Lord Mayor (burgemeester) van die City of London - die historiese middestad van Londen wat as selfregerende nedersetting met stadstatus steeds sekere voorregte geniet. Dit is net teenoor die Bank van Engeland in Mansion Street geleë.

Mansion House is in Londen se kortste straat geleë - Mansion House Street

Die statige gebou, wat tussen 1739 en 1752 volgens 'n ontwerp van George Dance die Ouere met 'n Palladiaanse Portlandsteenfasade en ses Korintiese suile opgerig is, is een van die historiese argitektoniese besienswaardighede in die City of London wat jaarliks sowat 50 000 besoekers lok.

Naas Guildhall is dit ook een van die geboue wat deur die stadsregering vir besondere funksies soos amptelike onthale gebruik word. Die bekendste hiervan is die jaarlikse feesmaal wat deur die Lord Mayor aangebied word en waartydens die Britse minister van finansies, die Chancellor of the Exchequer, sy tradisionele Mansion House Speech lewer, 'n toespraak oor die toestand van die Britse ekonomie.

Eksterne skakels

• Wikimedia Commons het meer media in die kategorie Mansion House, Londen.
• (en) Amptelike webwerf