Metanogenese is die vorming van metaan deur mikrobes wat ook as metanogene bekend staan. Organismes wat daartoe in staat is om metaan te produseer is almal afkomstig uit die koninkryk Archaea, 'n groep wat filogeneties onderskei kan word van beide eukariote en bakterieë, alhoewel baie van hulle in nou met anaërobiese bakterieë saamleef. Die produksie van metaan is 'n belangrike en wydverspreide vorm van mikrobiese metabolisme. In die meeste omgewings is dit die finale stap in die ontbinding van biomassa.

Onlangs is daar getoon dat die blaarweefsels van lewende plante metaan uitskei.[1] Die meganisme waarop sodanige metaanproduksie geskied is egter nog onbekend, maar die implikasies is verreikend aangesien dit 'n voorbeeld is van metanogenese is wat in nie-mikrobiese organismes voorkom, skynbaar onder aërobiese toestande. Die meeste inligting bekend oor metanogenese is afkomstig vanuit studies van mikrobes.

Biochemie van metanogenese wysig

Metanogenese in mikrobe is 'n vorm van anaërobiese respirasie.[2] Metanogene gebruik nie suurstof vir asemhaling nie, die groei van metanogene word inteendeel daardeur beperk. Die finale elektron akseptor is nie suurstof nie maar wel koolstof. Die twee bes beskryfde reaksieroetes behels die gebruik van koolstofdioksied en asynsuur as finale elektronakseptors:

CO2 + 4 H2 → CH4 + 2H2O

CH3COOH → CH4 + CO2

Daar is egter aangetoon dat metanogenese ook van ander klein organiese verbindings kan benut soos mieresuur, metanol, metielamiene, dimetielsulfied en metaantiol.

Die biochemie van metanogenese is relatief ingewikkeld en sluit die volgende koensieme en kofaktore in: F430, koënsiem B, koënsiem M, metaanfuraan en metaanopterien. F430 benodig die element nikkel.[3]

Verwysings wysig

  1. Kepler F (2006). "Methane emissions from terrestrial plants under aerobic conditions". Nature. 439: 187–191. doi:10.1038/nature04420.
  2. Thauer, R. K., "Biochemistry of Methanogenesis: a Tribute to Marjory Stephenson", Microbiology, 1998, volume 144, bladsye 2377–2406.
  3. Nickel Tetrapyrroles in Methanogenic Bacteria: Structure, Function and Biosynthesis R.K.Thauer Zentralblatt für Bakteriologie Mikrobiologie und Hygiene: I. Abt. Originale C: Allgemeine, angewandte und ökologische Mikrobiologie Volume 3, Issue 2, May 1982, Pages 265-270