Michellspas

Michellspas
Eertydse tolhuis
Ligging	Tussen Tulbagh en Ceres
Hoogte	371 m
Oppervlak	Teer
Ingenieur	Andrew Geddes Bain
Begin in	1846
Voltooi in	1848
In	Skurweberg
Pad	R46

Die Michellspas is 'n bergpas oor die Skurweberg in die Wes-Kaap, Suid-Afrika. Dit verbind die Warm Bokkeveld en Ceres met Kaapstad en die Boland.

Agtergrond

Die eerste pas is in 1765 deur Jan Mostert op sy eie koste deur 'n ravyn van die Dwarsrivier gebou waar dit saam met die Witelsrivier in die Breederivier uitkom. Die pad het teen 'n steil nek uitgegaan net voor dit na die Ceresvallei afgedaal het. Die pas was gedug en het die rivier verskeie male gekruis. Die pas het bekend gestaan as die Mostertshoekpas.

Andrew Geddes Bain

Weens toenemende verkeer het kol. Charles Michell, landmeter-generaal van die Kaap, in 1846 vir Andrew Geddes Bain opdrag gegee om 'n nuwe pad te maak deur die ravyn. Met 240 bandiete het Bain aan die werk gespring en die pas is in net meer as twee jaar voltooi. Die pas is op 1 Desember 1848 geopen deur sir Harry Smith. Hy het die pas na kol. Michell vernoem.

Eerste verbetering

Die pas is net na die Tweede Wêreldoorlog verbeter en met beton bedek, want teer was nie beskikbaar nie. Die 'nuwe' pas het grotendeels Bain se roete gevolg en is geopen op 31 Maart 1946.

Onlangse verbeteringe

'n Suid-Afrikaanse Klas 19D by Michellspas, 19 Desember 2015

Die pas is die laaste keer gedurende 1988 tot 1994, deur die padboukonstrusiespan van die Kaapse Provinsiale Administrasie onder leiding van mnr. Fritz Schwabe, herkonstrueer. Die resident-ingenieur was mnr. Ettiene Roux bygestaan deur ingenieurs en tegnici soos Fred Henning, John Cullum, Stephan Condon, Gerhard Botha, Francois Ryke, Bertie van Koersveld, Steward Bain en Schalk Carstens. Die hoofvoorman was Isak Engelbrecht. Verder was daar 'n span van meer as 300 mense, wat brugbouers, voormanne, blasters, vakmanne en arbeiders ingesluit het, almal verbonde aan die Kraaifonteinse padbou-eenheid. Die pad is verbreed met klimlane vir vragmotors en die ou betonpad wat na die Tweede Wêreldoorlog deur Italiaanse kryggevangenes gebou is, is met 'n bitumeneuse blad vervang. Alle waterweë in terme van pyp en kasduikers is ook vervang. 'n Nuwe brug is oor die Breederivier gebou – die Wittebrug.

Spelling

Die korrekte spelling van die pas se naam is sonder 'n T. Dus Michellspas. Die pas se naam word dikwels verkeerdeliks as "Mitchellspas" (met 'n T) aangegee aangesien dit 'n meer bekende spelling van die van is. Die pas is na landmeter-generaal Charles Cornwallis Michell, wat superintendent van openbare werke in die Kaapkolonie tydens die bou van die pas was, vernoem.

Bronne

• Die Suid-Afrikaanse Gids: feite en wenke. 2009. ISBN 978-1-86919-324-9
• Op Pad in Suid-Afrika. B.P.J. Erasmus. 1995. ISBN 1-86842-026-4
• Ross, Graham: The Romance of Cape Mountain Passes. Kaapstad: Sunbird, 2011. ISBN 978-1-920289-51-5
• Wood, V.C.: Die Bergpasse van Kaapland. In: Lantern. Tydskrif vir Volksopvoeding. Jaargang 7, nr. 4, Oktober 1957

Sien ook

• Lys van bergpasse in Suid-Afrika