NG gemeente Belfast

Die NG gemeente Belfast is ’n gemeente in die Nederduitse Gereformeerde Kerk se Oostelike Sinode. Buiten die hoofkerk op Belfast, Mpumalanga, behoort die kerkgebou van die voormalige NG gemeente Dullstroom ook aan die gemeente nadat Dullstroom by Belfast ingelyf is.

Die eerste kerk en skool op Belfast.

Die NG kerk Belfast. Die argitek van die oorspronklike gebou was Johannes Rienk Burg, maar Gerard Moerdyk het die toring ontwerp, wat heelwat later aangebring is.

Ds. J.H.B. Strofberg.

Dié hoeksteen is op 19 Augustus 1961 gelê nadat die kerkgebou opnuut vergroot en herbou is.

Lede van die Ring van Lydenburg wat op 17 Februarie 1905 op Carolina byeen was. Tweede van links sit ds. A.P. Burger van Middelburg, en naas hom di. H.J. Neethling (Lydenburg, voorsitter), A.G. du Toit (Carolina, scriba), P.W. Ennis (Ermelo), en H.T. Gonin (Belfast). Afgevaardigde kerkraadslede was oudl. J.J. Schutte en diak. C.L.W. von Zwiel (Lydenburg), oudl. J. de Clercq en diak. I.F. Haupt (Middelburg), oudle. L.D. Fourie en D. F. van Aardt (Ermelo), oudl. G.M. Britz en diak. J.C. Swanepoel (Roossenekal), oudl. G.J. van Loggerenberg en diak. P.D. Grobler (Carolina), en oudl. I.J. Breytenbach en diak. C.J. Maré (Belfast).

Stigting

Hierdie gemeente, wat die naam van die dorp Belfast dra wat deur ’n man van Ierse afkoms aangelê is, is in die jaar 1899 gestig. Die nuwe dorp was geleë in die distrik Lydenburg, ongeveer op die skeiding tussen die Hoëveld en die Laeveld. Met sy stigting het die gemeente egter ’n deel van die distrike Lydenburg, Middelburg en Carolina beslaan.

Eerste leraars

Aangesien die stigting in dieselfde jaar plaasgevind het as die uitbreek van die Tweede Vryheidsoorlog en die eerste beroepe leraar, ds. J.C. Hefer, bedank het, het sy vakant gebly tot in 1904. Die derde beroep wat in 1904 uitgebring is, was op ds. H.T. Gonin, wat dit dan ook aangeneem het. Hy het die gemeente vrome getrouheid tot September 1913 bedien, toe hy as dosent na die Sendinginstituut op Wellington gaan. Sy opvolger was ds. J.H.M. Stofberg.

Kerkbou

In 1894 is die hoeksteen gelê van die gebou wat as skool sowel as kerk moes dien. Lank is die behoefte aan ’n groter kerk gevoel, maar eers in April 1914 is die hoeksteen van die huidige kerk gelê deur die, volgens Ons Kerk Album, "onvergetelike, en door zijn volk innig beminde" kmdt.genl. C.F. Beyers. Ds. Stofberg het die kerk ingewy. Danksy die hartlike samewerking van die gemeente en milde skenkings van vele, kon die skuld binne twee jaar betyds afbetaal word, en dit nieteenstaande die swaar tye veroorsaak deur die Eerste Wêreldoorlog. Weens die oorlog kon die toring, eindelik ontwerp deur die vermaarde argitek Gerard Moerdyk, en galery egter nie dadelik aangebring word nie.

Enkele leraars

• Henri Theodore Gonin, 1904 – 1913
• G.M. Steyn
• M.H.O. Kloppers
• Benjamin Daniel Blom, 2 Desember 1983 – 26 April 2020

Bronne

• (nl) Maeder, ds. G.A. en Zinn, Christian. 1917. Ons Kerk Album. Kaapstad: Ons Kerk Album Maatschappij Bpkt.

Sien ook

• Gereformeerde kerk Belfast