Netwerktyd-protokol
Netwerktyd-protokol (Engels: Network Time Protocol; afgekort NTP) is 'n protokol waarmee rekenaars onderling met mekaar in verbinding tree om hul interne horlosies te sinkroniseer. NTP is een van die oudste Internetprotokolle en luister op UDP-poort 123.
NTP is gebaseer op die aanname dat die netwerkvertraging voorspelbaar is. Die rekenaarnetwerk word hiërargies ingedeel, waar rekenaars met die noukeurigste tydbron as "stratum 1" aangedui word. Die rekenaars wat hul tyd van so 'n bediener bekom is per definisie op "stratum 2" of laer.
'n NTP-kliënt kan verskeie NTP-bedieners (bronne) gebruik, waar die NTP-kliënt self besluit welke bron die beste werk. Aan die hand van sekere kriteria kies 'n NTP-kliënt 'n bron en sinkroniseer sy tyd daarmee. Klein verskille in tyd word deur die kliënt opgemaak deur die rekenaar se klok vinniger of stadiger te laat loop. As gevolg hiervan kan die tyd sonder enige spronge reggestel word. Die kliënt bly egter met al sy NTP-beidieners in verbinding, en kies 'n ander bron vir sinchronisasie as dit 'n meer stabiele tyd bied.
'n Atoomhorlosie kan byvoorbeeld as 'n tydbron dien, so ook 'n DCF77- of GPS-ontvanger. Die GPS-sein bevat onder meer akkurate tyd. Die rekenaar wat hierdie seine ontvang kan ander rekenaars deur die netwerk met millisekonde-akkuraatheid sinchroniseer.
Spesiale toestelle is in die handel beskikbaar wat die funksie van 'n DCF77- of GPS-klokontvanger met die van 'n NTP-bediener kombineer.
SNTP wysig
Microsoft gebruik 'n protokol vir Windows wat SNTP genoem word (waar die S vir Simple staan). Die protokol is, hoewel dit ook rekenaars met mekaar kan sinchroniseer, nie met die "regte" NTP vergelykbaar nie. Die aanpassing van tyd is skielik en nie geleidelik nie (met spronge). Dit kan ook nie die betroubaarheid van verskeie tydbronne evalueer nie. Dit kan wel 'n normale NTP-bediener as tydsbron gebruik.