Oktober 2020 veldbrande in die Wes-Vrystaat

vernietigende veldbrande, 18 tot 24 Oktober 2020, in Suid-Afrika

Die Wes-Vrystaatse veldbrande van Oktober 2020 het groot dele landbougrond van 'n belangrike landboustreek,[1] die Tokologo en Tswelopele Plaaslike Munisipaliteite, in puin gelê tydens warm en winderige toestande. Die brande is vanaf Hertzogville deur die wind in 'n oos- en suidoostelike rigting gedryf,[2] en het na bewering op Sondag 18 Oktober ontstaan toe betogers ’n Jojo-watertenk en/of buitebande[3] op die R708-pad net buite die dorp aan die brand gesteek het.

Die areas wat deur die brande geteister is.

Kort daarna het nog drie brandpunte ontstaan, waaronder een tussen Kimberley en Warrenton wat teen 10 km per uur ooswaarts voortgewaai is.[2] Die vierde brand wat laatnag op 'n plaas naby Christiana ontstaan het kon gou deur 'n span werkers geblus word. Teen Vrydag 23 Oktober is die brande grootliks onder bedwang gebring,[4] maar teen Saterdagmiddag is daar steeds brande geblus.[1]

Skade wysig

Meer as 100 kommersiële boere, benewens hoewe-eienaars, is deur die brande geaffekteer.[4] 1 800 stuks vee[4] benewens wild het in die brand omgekom, of het brandwonde opgedoen. Plaasgeboue en meer as 130 000 ha weiveld het afgebrand,[5][6] en daar is gevrees dat sekere boere kan bankrot speel.[2] 'n Jong boer van Hertzogville het op 19 Oktober tydens die brandslaan 40% derdegraadse brandwonde opgedoen, en moes ook behandeling vir rookinaseming ontvang.[5] Verskeie ander brandslaners is ook beseer.[1]

Optrede en hulpverlening wysig

Die Hertzogville-betogers was ontevrede met die kwaliteit van water wat aan hulle gelewer word. Die SAPD het 17 verdagtes vir kwaadwillige saakbeskadiging in hegtenis geneem,[7] terwyl Agri Hertzogville ’n saak van brandstigting aanhangig gemaak het.[2] Agri Hertzogville het ook hulpverlening georganiseer, en honderde mense en instansies het op Saai en Vrystaat Landbou (VL) se oproepe om hulpverlening gereageer.[1][8] Voer, vee en finansiële bydraes is ontvang, en ondernemings het aangebied om te help met verlore infrastruktuur.

Verwysings wysig

  1. 1,0 1,1 1,2 1,3 Christel Cornelissen, Brande in Vrystaat dwing boere 'op hulle knieë', Maroela Media (25 Oktober 2020)
  2. 2,0 2,1 2,2 2,3 Alani Janeke, KYK! Hertzogville: 'Die wêreld brand af hier by ons. Dis nag', Landbou, netwerk24.com (20 Oktober 2020)
  3. Tania Heyns, Talle diere in Vrystaatse veldbrand dood, Maroela Media (19 Oktober 2020)
  4. 4,0 4,1 4,2 Pieter Dempsey, More than 1 800 livestock dead after Free State wildfires, Farmer's Weekly (23 Oktober 2020)
  5. 5,0 5,1 Anja van der Merwe, Vrystaatse brande: Jong man veg om sy lewe, Maroela Media (21 Oktober 2020)
  6. Natasha Venter, Hertzogville-brande en die verskroeideaardebeleid, Maroela Media (24 Oktober 2020)
  7. LeandreAdmin, 17 mense in hegtenis geneem in verband met die verwoestende brande in die Vrystaat Geargiveer 30 Oktober 2020 op Wayback Machine, rosestad.co.za (23 Oktober 2020)
  8. Tania Heyns, Duisende hektaar in Vrystaat afgebrand, Maroela Media (20 Oktober 2020)