Oorlog van die Goue Stoel

Die Oorlog van die Goue Stoel was die laaste in die reeks konflikte tussen die regering van die Britse Ryk aan die Goudkus (later Ghana) en die Asjantiryk (later die Asjantistreek), ’n outonome staat in Wes-Afrika wat in voortdurende konflik met Brittanje en sy vasalstate aan die kus was. Dit was ook bekend as die Yaa Asantewaa-oorlog, die Derde Asjanti-ekspedisie en onder verskeie ander name.

Verloop

Brittanje het die Asjantiryk in 1896 geannekseer en die koning, Prempeh I, na die Seychelle verban. Toe die Asjanti teen die Britse bewind begin rebelleer onder leiding van die Asantekoningin Yaa Asantewaa, die koninginmoeder van Ejisu, het die Britte die onrus probeer onderdruk. Die Britse goewerneur, sir Frederick Hodgson, het ook daarop aangedring dat die Goue Stoel, die troon en simbool van die Asjanti se soewereiniteit, aan die Britte oorhandig word.

Die Asjanti en die Britte was van 28 Maart tot laat in September 1900 in ’n stryd gewikkel. Die Britte het eindelik geseëvier; hulle het Asantewaa en ander leiers ook na die Seychelle verban. In Januarie 1902 het die Britte finaal ’n protektoraat in die koninkryk afgekondig.

Toe die Britse kolonie van die Goudkus in 1957 die eerste onafhanklike land in Afrika suid van die Sahara word, is die Asjantiryk in die nuut gestigte Ghana opgeneem.

Skakels

• Hierdie artikel is in sy geheel of gedeeltelik uit die Engelse Wikipedia vertaal.