Die broers Lucien en Marius Petipa was van die beste balletdansers van die 19e eeu. Marius Petipa het veral as choreograaf uitgeblink en hy word as die vader van die klassieke ballet beskou. Die beroemde balletfamilie Petipa was uit Frankryk afkomstig, waar Jean Antoine Petipa (1796- 1855) as choreograaf aan die Théâtre de Bordeaux verbonpe was.

Lucien Petipa

Nadat hy in Brussel, Parys en Madrid gewerk het, het hy na St. Petersburg vertrek, waar hy in 1848 dosent geword het aan die Keiserlike Balletskool. Sy seuns Lucien Petipa (1815- 1898) en veral Marius Petipa (1819- 1910) het daar wêreldroem verwerf. Lucien het van sy vader balletonderrig ontvang en sy debuut in 1840 in die Paryse Opera gemaak. Hy was een van die beste dansers van sy tyd, en sy belangrikste dansmaat was Carlotta Grisi (1819- 1899).

Lucien het die ballet Sakountala (1858) geskep. In 1865 het hy leier van die balletgeselskap by die Paryse Opéra geword en vir die geselskap die ballet Namouna op musiek van Lalo geskep (1882). Marius Petipa word oor die algemeen beskou as die vader van die klassieke ballet. Hy is ook deur sy vader onderrig en het in 1838 in Nantes sy debuut gemaak. In 1847 het hy 'n eenjaarkontrak met die Marijinskiteater in St. Petersburg aangegaan, waar hy vir die res van sy loopbaan gebly het.

In 1854 is hy met Marie Soerovsjikova (1836- 1882) ‘n leerling aan die Keiserlike Balletskool, getroud, en in dieselfde jaar het hy dosent aan hierdie balletskool geword. In 1858 het Marius Petipa sy eerste oorspronklike ballet vir die Marijinskiteater geskep, naamlik Un mariage sous la régence. In 1862 het hy Jules Perrot as eerste choreograaf opgevolg, 'n stap wat die regstreekse gevolg was van die oorweldigende sukses wat hy met sy ballet La fifle du pharaon behaal het.

Marius Petipa word as een van die beste choreograwe van alle tye beskou. Hy het altyd die verwerkingsmoontlikhede van onderwerpe ondersoek en vir elke produksie het hy 'n uitgebreide skema opgestel. Hy het die komponiste van gedetailleerde planne voorsien oor die aantal mate, instrumentasie en aksente in die balletmusiek. Hy is as 'n tiran beskou en was gevolglik nie baie gewild onder sy kollegas nie. 'n Baie begaafde choreograaf soos sy assistent Ljel Ivanovitsj Ivanof (1834-1901), skepper van Casse-Noisette ("Die Neutkraker"; 1892) en Le lac des cygnes ("Swanemeer"; 1895), het voortdurend in die skadu van Petipa geleef.

Marius Petipa

Nog 'n belangrike assistent van Petipa was Enrico Cecchetti (1850-1928). Petipa het meer as 60 ballette geskep en vir heel party verwerkings van ander ballette gesorg. Hy is in 1903 gedwing om hom aan die balletwêreld te onttrek vanweë die mislukking van sy ballet Le miroir magique ("Die towerspieël").

Bronnelys wysig