Petrus Bosman
Petrus Bosman (1928–2008) was ’n Suid-Afrikaanse balletdanser, choreograaf en hulpdirigent wat in Engeland, Frankryk en die VSA gewerk het.[1] Hy was die eerste danser wat as solis by die Royal Ballet aangestel is, sonder dat hy in dié akademie geskool is. Hy was vir 18 jaar lank ’n lid van dié geselskap. Hy het talle liefdadigheidsgalas by die Royal Opera House (Covent Garden) aangebied en is deur koningin Elizabeth II daarvoor vereer.
Petrus Bosman | |
|---|---|
| Gebore | Jan Petrus Bosman 1928 |
| Sterf | 19 Julie 2008 (op 80) |
| Nasionaliteit | Suid-Afrika |
| Beroep | Balletdanser |
Lewensloop
wysigJan Petrus Bosman is in 1928 op Kuilsrivier van 'n Afrikaanse gesin gebore.[2] Hy was familie van die bekroonde skrywer, Herman Charles Bosman (1905–1951). As tiener het hy vir klasse aan die Universiteit van Kaapstad se Balletskool ingeskryf, waar hy onder Dulcie Howes en Cecily Robinson opgelei is. In 1949 (op 21 jarige ouderdom) is hy na Londen om sy studies onder Anna Northcote (ook bekend as Anna Severskaya) voort te sit.
In 1951 sluit hy by die London Festival Ballet aan waar hy die volgende agt jaar in stede regoor Engeland dans. In 1959 sluit hy by die Royal Ballet aan, waar hy 18 jaar lank werksaam was. Gedurende die tyd besoek hy Suid-Afrika 'n paar keer vir plaaslike opvoerings.
Bosman het meestal teenoor die ballerina Merle Park gedans. Hy word veral onthou vir sy vertolking van een van die Lelike Susters teenoor Frederick Ashton in Aspoestertjie.
In 1977 verhuis hy na die VSA, waar hy tot in 2006 by verskillende geselskappe as répétiteur en choreograaf gewerk het.[3] Hy is op 19 Julie 2008 in Indianapolis oorlede.
Bronnelys
wysig- Serfontein, Pieter: Petrus Bosman. In: Lantern. Tydskrif vir Kennis en Kultuur. Jaargang 22, nr. 3, Maart 1973
Verwysings
wysig- ↑ HAT Taal-en-feitegids, Pearson, Desember 2013, ISBN 978-1-77578-243-8
- ↑ Marina Grut, "Bosman, Petrus," in The History of Ballet in South Africa (Cape Town: Human & Rousseau, 1981), p. 357.
- ↑ Valerie West, "Petrus Bosman," obituary, The Stage (Londen), 12 Augustus 2008.