Prinses Beatrice van York

Prinses Beatrice[1] (Beatrice Elizabeth Mary; gebore 8 Augustus 1988) is 'n lid van die Britse koninklike familie. Sy is die oudste dogter van prins Andrew, Hertog van York, en Sarah, Hertogin van York. Met haar geboorte was sy die vyfde aanspraakmaker op die Britse troon, maar sy is nou negende. Sy het 'n jonger suster, Eugenie.

Prinses Beatrice van York, 2018

Beatrice is in die Portland-hospitaal in Londen gebore. Sy het by St George's School, Ascot, skoolgegaan voordat sy aan Goldsmiths College gestudeer het en 'n baccalaureusgraad in geskiedenis behaal het. Sy was 'n kort tydjie by buitelandse sake en Sony Pictures werksaam voordat sy by die sagtewaremaatskappy Afiniti as visepresident van strategiese vennootskappe aangesluit het. Beatrice werk ook privaat saam met 'n aantal liefdadigheidsorganisasies, insluitend die "Teenage Cancer Trust" en "Outward Bound".

Haar ouers is op goeie terme geskei toe sy sewe jaar oud was. Die hertog en hertogin van York het ingestem tot gesamentlike toesig oor hul twee kinders.[2] Beatrice en haar suster het gereeld saam met een of albei hul ouers na die buiteland gereis.

Beatrice is in 2020 met Edoardo Mapelli Mozzi, 'n eiendomsontwikkelaar, getroud. Hul eerste dogter, Sienna Elizabeth, is op 18 September 2021 gebore.

Verwysings wysig

  1. "ANNEX D" (PDF). The Royal Family. Besoek op 9 Desember 2020.
  2. "1992: Fergie and Andrew split". BBC. Besoek op 15 Maart 2018.

Eksterne skakels wysig