Rachel Carson

Rachel Carson (27 Mei 1907 - 14 April 1964), Amerikaanse ekoloog, outeur en wetenskaplike, is bekend vir haar gawe om wetenskaplik korrekte feite met welsprekende skryfwerk te kombineer. Sy het twee van die mees invloedryke boeke van die laaste halfeeu geskryf wat sterk bygedra het tot die vorming van die omgewingsbeweging en het Kongres se idee van omgewingsrentmeesterskap geprikkel.

Rachel Carson
Rachel Carson in 1940
Gebore	Rachel Louise Carson 27 Mei 1907 Springdale, Pennsilvanië
Sterf	14 April 1964 (op 56) Silver Spring, Maryland
Nasionaliteit	Verenigde State
Beroep	Mariene bioloog, skrywer en omgewingspesialis
Bekend vir	The Sea Around Us (1951) The Edge of the Sea (1955) Silent Spring (1962)
Termyn	1937–1964

The Sea Around Us, 'n biografie van die see, was vir ses en tagtig weke op die nasionale topverkoperlys en het die Goue Medalje van die New York Dierkundevereniging, die Goue Medalje van Die Geografiese Vereniging van Philadelphia, die John Burroughs Medalje en die Nasionale Boektoekenning gewen en is uiteindelik in dertig tale vertaal.

Silent Spring, gepubliseer in 1962, het 'n nasionaal geopenbaarde twis oor die gebruik van insekdoders ontlont en uiteindelik die wêreld gewaarsku teen die gevare van chemiese vergiftiging. Silent Spring het ook in Engeland 'n topverkoper geword en word steeds beskou as die hoeksteen van die nuwe omgewingskunde. Tien jaar na Silent Spring die waarskuwing bekend gemaak het, is die gebruik van DDT in die Verenigde State verban.

Lewensgeskiedenis

Rachel Louise Carson is op 27 Mei 1907 op 'n klein plaas op die Alleghenyrivier naby Pittsburgh gebore as die dogter van Robert Warden en Maria Carson. Haar liefde vir die natuur is deur haar ma gestimuleer wat haar oë geopen het vir die details van die natuurwêreld. Afgesien van haar liefde vir die natuur het sy 'n natuurlike talent vir skryf gehad en haar eerste publikasie het in die St Nicholas literêre tydskrif vir kinders verskyn toe sy maar 'n skrale tien jaar oud was.

Na sy van Parnassus Hoërskool gegradueer het, het sy by die elite Pennsylvania Kollege vir Vroue ingeskryf om in Engelse opstel skryf te spesialiseer. 'n Vereiste dat elke student twee semesters wetenskap doen, het haar liefde vir biologie laat herontwaak en sy het besluit om haar hoofvak na dierkunde te verander. In 1929 het sy met 'n BA (cum laude) gegradueer en vir sewe ononderbroke somervakansies by die Johns Hopkins Somerskool klas gegee. In 1931 het sy by die Universiteit van Maryland begin werk waar sy vir vyf jaar dierkunde gedoseer het en in 1932 verkry sy haar Meestersgraad in dierkunde aan die Johns Hopkins Universiteit.

Tydens haar tyd by Maryland Universiteit, het Carson haar nagraadse studies in die somer by die Laboratorium vir Mariene Biologie by Woods Hole, Massachusetts by Cape Cod voortgesit. Daar het sy deur die see bekoor geraak en in 1936 het sy 'n posisie as junior waterbioloog by die Buro van Visserye in Washington aanvaar. In 1941 het sy haar eerste boek, Under The Sea Wind gepubliseer maar dit het amper ongemerk verby gegaan.

In 1946 is sy bevorder tot inligtingspesialis en drie jaar later het sy hoofredakteur van publikasies geword. In 1951 het sy nasionale bekendheid verwerf toe haar boek The Sea Around Us 'n topverkoper geword het en sy verskeie toekennings gewen het. In 1952 het Carson uit die regeringsdiens getree en haarself tot haar skryfwerk en haar derde boek, Edge Of The Sea, toegewy.

Carson het vir die eerste keer by haar bewaringskollegas by Visserye uitgevind van die gevare wat DDT vir voëls en wildlewe ingehou het. 'n Brief van ou vriende wat haar ingelig het wat die vernietiging van lugbesproeiing aan hulle vryplaas aangerig het, het haar oorreed om die uitwerking van insekdoders op die natuur te ondersoek. Huiwerig om haar fokus te verskuif, maar aangedryf deur die wete dat die saak aandag moes kry, het Carson Silent Spring geskryf waarin sy die publiek gewaarsku het teen die langtermynuitwerkings van die misbruik van insekdoders. Die reaksie van die chemiese nywerheid was oorweldigend en Carson moes 'n storm van dispuut en persoonlike aanslag trotseer. Maar deur hierdie veldtog om haar as 'n 'histeriese vrou' af te maak, het die chemiese nywerheid net openbare belangstelling geprikkel.

Rachel Carson is op 14 April 1964 oorlede na 'n lang stryd teen kanker. Sy het nooit die vrugte van haar arbeid aanskou nie.