Robert Mitford Bowker

Robert Mitford Bowker (Newcastle-On-Tyne, Northumberland, Engeland, 30 Augustus 1810 – Craigie Burn, by Somerset-Oos, Kaapkolonie, 23 September 1892) was ’n Britse Setlaar en Kaapse parlementslid.

Robert Bowker.

Die Bowkers se plaas Tharfield naby Port Alfred waar Robert sy jeugjare deurgebring het.

Bowker was die sesde van die nege seuns van Miles Bowker en sy vrou, Anna Maria Mitford. Hy word groot op sy vader se plaas Tharfield in die distrik Albanie, en blykbaar woon hy daar tot sy huwelik op 19 Desember 1838 met Sarah Elizabeth, dogter van Robert Hart van die (nou geskiedkundige) plaas Glen Avon, by Somerset-Oos. Uit hulle huwelik is vyf dogters en agt seuns gebore.

Bowker en sy vrou vestig hul op Craigie Bum, 'n plaas hoog in die berge bokant Somerset-Oos, wat as gevolg van sy afgeleë ligging dikwels tydens die grensoorloë deur sy broers as skuilplek vir hul gesin en hul vee gebruik word. Daar hou hy hom besig met boerdery en tuinmaak, waarvan hy besonder baie hou. Hoewel sy afgesonderde bestaan deur krygsdiens en sy parlementêre verpligtinge onderbreek is, kon dit moontlik tot sy konserwatiewe opvattings bygedra het.

Bowker het hom in die Agtste Grensoorlog (1850–’53) onderskei. Campbell stel dit beslis dat hy ook in die Sesde (1834–’35) en Sewende (1847) Grensoorloë gedien het, maar I. en K. Mitford-Barberton vind nie bevestiging hiervoor nie.

Bowker verteenwoordig Somerset-Oos in die laerhuis van 1854 tot 1868, en weer van 1870 tot 1873. Later word hy van 1881 tot 1890 ook lid van die Wetgewende Raad vir die Noordoostelike Sirkel. In albei rade was hy 'n voorstander van 'n hoër stemregkwalifikasie. Bowker was 'n beskeie verteenwoordiger van die Britse Setlaars, en van 'n familie wat baie bygedra het tot die ontwikkeling van die land waar hulle hul kom vestig het.

Hy is begrawe in die familiekerkhof op Craigie Burn.

Bronne

• (af) De Kock, W.J. (hoofred. tot 1970) en Krüger, prof. D.W. (hoofred. sedert 1971). 1972. Suid-Afrikaanse Biografiese Woordeboek. Pretoria: Raad vir Geesteswetenskaplike Navorsing.

Eksterne skakels

• (en) Foto's en nadere besonderhede van die familie Bowker, op 1820settlers.com. URL besoek op 6 Mei 2016.