Rooiboswyn het sy oorsprong in die Wes-Kaap, Suid-Afrika. Die produksieproses van hierdie wyn stem met dié van tradisionele wyne ooreen, behalwe dat die hout van die rooibos (Aspalathus linearis) en die heuningbos (Cyclopia spp.) in plaas van tradisionele eikehout tydens die verouderingsproses gebruik word. Dit lei tot ’n produk vry van swaweldioksied, met ’n unieke geurkomponent te wyte aan die rooi- en heuningbos.

Swaweldioksied en wynproduksie wysig

Die maak van rooiwyn is ’n proses wat in verskillende fases geskied: pars (ekstraksie van die sap), fermentasie, veroudering en bottelering. Ten einde die groei van ongewenste mikro-organismes soos Brettanomyces te voorkom, word daar voor en tydens die verouderingsproses swaweldioksied (SO2) (0.8–1.5 mg/liter) by die druiwe gevoeg asook by die wyn voor die botteleringsproses. Die toevoeging van SO2 verhoed ook die oksidering van die wyn; ’n verskynsel wat tot verbruining van die wyn en die verlies van kultivar-spesifieke geure lei.[1][2] As gevolg van die gesondheidsnadele wat met swaweldioksied verbind word, en die allergiese reaksie van sulfietsensitiewe individue, is daar ’n toename in verbruikersvoorkeur vir wyne met min of geen SO2 inhoud.[2]

Antioksidant-eienskappe van rooibos en heuningbos wysig

Die medisinale gebruik van Suid-Afrikaanse rooibos en heuningbos is welbekend en word gebruik vir die maak van kruietee. Die hout van rooibos en heuningbos bevat hoë vlakke van kragtige antioksidante, lae tannienvlakke en is vry van kafeïen. Hierdie antioksidantiese eienskappe maak hulle nie alleen moontlike alternatiewe vir SO2 in die preservering van wyn nie,[3][4][5][6] maar kan selfs ’n positiewe impak hê op die gesondheid van verbruikers.[5]

Rooiboswyn - produksie wysig

Tydens die verouderingsfase van rooiboswyn word die hout van rooibos (Aspalathus linearis) en heuningbos (Cyclopia spp.) instede van tradisionele eikehout gebruik.[6]

Navorsing aan die Universiteit van Stellenbosch (Suid-Afrika) dui daarop dat behandeling met rooibos- en heuningbos-plantmateriaal rooiwyn teen die negatiewe gevolge van blootstelling aan suurstof beskerm wat daarom die gebruik van SO2 onnodig maak.[5]

Die gebruik van rooibos en heuningbos plantmateriaal as ’n alternatiewe preserveermiddel in die plek van SO2 tydens die produksie van rooiwyn, is gepatenteer[7] en geregistreer in 83 jurisdiksies regoor die wêreld.[4] Die rooiboswynproduk is vry van SO2 en het ’n unieke geurprofiel wat toegeskryf kan word aan die veroudering van die wyn in rooibos- en heuningboshout. Die swaelvrye produk word beskou as ’n gesonder alternatief vir tradisionele wyne en alkoholiese drankies.[3][7]

Vernaamste handelsmerke wysig

In 2013 was die Stellenbosch-gebaseerde Audacia in Suid-Afrika die eerste om ’n rooiboswyn – ’n merlot – in Suid-Afrika te vervaardig. Die reeks rooiboswynprodukte het intussen uitgebrei om Cabernet Sauvignon, shiraz en ’n rooi- en ’n witversnit in te sluit.[8]

In 2014 het KWV Suid-Afrika (Edms) Bpk met ’n pinotage gevolg, wat onder die handelsnaam Earth’s Essence bemark word.[9][10]

Verwysings wysig

  1. Jackson, R.S. (2008). Wine science: principles and applications. Amsterdam; Boston: Elsevier/Academic Press.
  2. 2,0 2,1 Guerrero, Raúl F.; Cantos-Villar, Emma (Maart 2015). "Demonstrating the efficiency of sulfur dioxide replacements in wine: A parameter review". Trends in Food Science & Technology. 42 (1): 27–43. doi:10.1016/j.tifs.2014.11.004.
  3. 3,0 3,1 Hesseling, E (Junie 2014). "Audacia's 'tea wood' wine". Wineland (in Engels). Geargiveer vanaf die oorspronklike op 18 Augustus 2016.
  4. 4,0 4,1 http://www.reuters.com/article/us-southafrica-rooiboswine-idUSKBN0M511620150309
  5. 5,0 5,1 5,2 De Wet, A (2015). The use of rooibos ("Aspalathus linearis") and honeybush ("Cyclopia" spp.) as wood alternative in red winemaking. Stellenbosch University.
  6. 6,0 6,1 Jooste, B (2015). "Rooibos-wooded wine – a world first from Stellenbosch". Ministerial Agriprobe. 12 (2): 5–6.
  7. 7,0 7,1 http://www.google.com/patents/WO2013068999A1?cl=en
  8. http://audacia.co.za/wines.html#rooibos-wines
  9. "argiefkopie". Geargiveer vanaf die oorspronklike op 24 Oktober 2015. Besoek op 23 Julie 2016.
  10. http://www.wine.co.za/news/news.aspx?NEWSID=25946