Slagting van Boetsja
Die slagting van Boetsja verwys na 'n reeks vermeende oorlogsmisdade wat in April 2022 in die Oekraïense stad Boetsja aan die lig gekom het, nadat die Russiese weermag tydens die Russiese inval in 2022 in Oekraïne uit die besette gebied noord van Kijif onttrek het.
Beeldmateriaal en getuienisse wys daarop dat Russiese troepe Oekraïense burgerlikes tereggestel het.[1]
Beskrywing wysig
Op 2 April 2022, na die onttrekking van die Russe, het die Oekraïense weermag 'n groot aantal liggame van gewelddadig vermoorde burgerlikes gevind wat op strate, in kelders en in 'n massagraf in Boetsja gelê het.[1] Die burgemeester, Anatoli Fedoroek, het aangekondig dat meer as 300 inwoners van die stad vermoor is.[2] Verskeie slagoffers se hande was agter hul rug vasgebind. Die burgerlikes wat dood is, het nie uniforms gedra nie en het alledaagse items soos 'n inkopiesak of 'n fiets by hulle gehad.[3]
Beelde van die satellietoperateur Maxar Technologies het getoon dat minstens elf van die lyke wat gevind is, reeds op 11 Maart daar was, toe die Russe nog die stad beset het. Hulle was nog nie ontbind nie weens die koue.[4]
Die menseregte-organisasie Human Rights Watch het ook oorlogsmisdade – teregstellings, verkragtings en diefstal – deur Russiese soldate in die Oekraïense stede Kijif, Tsjernihif en Charkof aangemeld.[5]
Reaksies wysig
Die Oekraïense president Wolodimir Zelenski het die slagting 'n volksmoord genoem.[6] Die honderde burgerlikes wat in Boetsja dood is, het internasionale verontwaardiging ontlok.[7][8] Die Oekraïense minister van buitelandse sake, Dmitro Koeleba, het die G7-lande gevra om so gou moontlik nuwe sanksies teen Rusland in te stel.[9][5]
Rusland het betrokkenheid by die Boetsja-slagting ontken en Oekraïne en Westerse lande daarvan beskuldig dat hulle die slagting geplant het. Die lyke wat in die beeldmateriaal gesien is, is na bewering omstreeks 30 Maart deur die Oekraïense weermag daar gedeponeer nadat Russiese troepe onttrek het, volgens 'n verklaring deur Dmitri Peskof, woordvoerder van die Kremlin, en die Russiese minister van buitelandse sake, Sergei Lawrof. Dit word as vals nuus in die Russiese media voorgehou.[10]
Ondersoek wysig
Om die oorlogsmisdade te kan vervolg, was dit belangrik dat die liggame in Boetsja met internasionale hulp ondersoek word. Kenners het teen te veel haas gewaarsku. Die aanskoue van die doodgemaakte burgerlikes is deur baie as afgryslik beskou en die drang om hulle so vinnig as moontlik te verwyder en te begrawe was sterk. "Sommige van die slagoffers in Boetsja was glo geboei toe hulle vermoor is. Dit is van die uiterste belang dat sulke bewyse bewaar word totdat forensiese kundiges dit kon ondersoek," sê Robert McNeill, 'n afgetrede Skotse patoloog wat betrokke was by die ondersoek. identifikasie van Moslems wat in 1995 in Bosniese Srebrenica doodgeskiet is. "Dit sal moeilik wees om Russiese soldate aan te kla."[11]
Die Amerikaanse koerant The New York Times het op 4 April ná 'n ondersoek aangekondig satellietbeelde wys dat die liggame al weke lank daar was.[12] Hommeltuigmateriaal wat op 3 Maart 2022 deur die Azof-bataljon afgeneem is, het gewys hoe Russiese gepantserde personeeldraers verskeie skote op 'n fietsryer afvuur terwyl hy om die draai ry. Verder af in die straat was 'n tenk met 'n groot wit V, 'n Russiese militêre simbool, daarop. Dit stem ooreen met beelde wat amper 'n maand later, op 1 April, op Telegram verskyn het van dieselfde fietsryer wat op dieselfde plek op straat lê.[13] Op 7 April 2022 het die Duitse weekblad Der Spiegel berig dat die Duitse intelligensiediens radioverkeer van Russiese soldate onderskep het wat oor burgerlike sterftes in Boetsja praat. Daar was duidelike verbande tussen die radioverkeer en 'n aantal slagoffers wat op beeldmateriaal gesien kon word. In een van die gesprekke het 'n soldaat gepraat oor iemand wat in Boetsja van sy fiets geskiet is.[14]
Verwysings wysig
- ↑ 1,0 1,1 "Russian retreat leaves trail of dead civilians in Bucha, a town near Kyiv". Reuters (in Engels). 2 April 2022. Besoek op 5 April 2022.
- ↑ "Satellite images show bodies lay in Bucha for weeks, despite Russian claims". The New York Times (in Engels). 4 April 2022. Besoek op 5 April 2022.
- ↑ "Drama in straten van Boetsja is 'anders dan raketbeschietingen'". nos.nl. Besoek op 3 April 2022.
- ↑ "Satellietbeelden tonen dat lijken in Boetsja er al weken liggen in tegenstelling tot wat Rusland beweert". HNL.BE. 5 April 2022. Besoek op 7 April 2022.
- ↑ 5,0 5,1 (en) "Ukraine: Apparent War Crimes in Russia-Controlled Areas". Human Rights Watch. 3 April 2022. Besoek op 3 April 2022.
- ↑ Zelenski noemt bloedbad in Boetsja genocide: gruwel dwingt EU tot meer sancties tegen Rusland, Gazet van Antwerpen, 4 April 2022.
- ↑ Premier Alexander De Croo veroordeelt "oorlogsmisdaden" in Boetsja, VRT NWS, 4 April 2022.
- ↑ Drama in straten van Boetsja is 'anders dan raketbeschietingen', NOS, 3 April 2022.
- ↑ "Wereldwijd geschokte reacties op doden in Boetsja: 'Dit zijn oorlogsmisdaden'". NOS Nieuws. 3 April 2022. Besoek op 3 April 2022.
- ↑ "Rusland ontkent 'Boetsja', toon in Russische media tegen Oekraïne verhardt". nos.nl. 4 April 2022. Besoek op 5 April 2022.[dooie skakel]
- ↑ "'Doe snel grondig forensisch onderzoek in Boetsja'". NRC. 5 April 2022. Besoek op 7 April 2022.
- ↑ "Bucha.Ukraine.Bodies". New York Times (in Engels). 4 April 2022. Besoek op 5 April 2022.
- ↑ "Meer aanwijzingen dat doden Boetsja wekenlang op straat lagen". NOS Nieuws. 5 April 2022. Geargiveer vanaf die oorspronklike op 5 April 2022. Besoek op 5 April 2022.
- ↑ "'Duitsland onderschepte gesprekken Russen over burgerdoden Boetsja'". nos.nl. 7 April 2022. Besoek op 7 April 2022.