Douw Venter: Verskil tussen weergawes

Ds. '''Douw Gerbrand Venter''' ([[Burgersdorp]], [[19 Februarie]] [[1891]] - [[Pretoria]], [[27 Augustus]] [[1968]]) was 'n predikant in die [[Gereformeerde Kerke in Suid-Afrika|Gereformeerde Kerk]], skrywer en kultuurleier.

 

Douw Venter was die oudste van die drie kinders van Johannes Petrus Venter en sy vrou, Hester Alida Maria Coetzee. Hy is aan die Vrije Christelijke School op [[Burgersdorp]] as onderwyser opgelei en het daarna 'n tyd lank aan 'n plaasskool skool gegee. In 1911 het hy die Matrikulasie-eksamen afgelê en hom van 1912 tot 1917 aan die Teologiese Skool op [[Potchefstroom]] onder leiding van prof. [[Ferdinand Postma]], [[Totius|J.D. du Toit]] en ander as predikant bekwaam. In hierdie tydperk is daar onder meer by hom 'n intense belangstelling vir die teologie van A. Kuyper gewek.

 

Ná sy legitimasie het hy die Geref. kerke [[Lichtenburg]] (1918-20), [[Lindley]] (1920-24), [[Steynsburg]] (1924-47) en [[Krugersdorp]] (1947-53) bedien, waarna hy die eerste heeltydse redakteur (1953-58) van ''Die Kerkblad'' in Potchefstroom geword het. Op [[Steynsburg]] het ds. Venter 'n merkwaardige rol in die kerk en in die samelewing, veral ten opsigte van die Afrikaanse nasionale kultuurontwaking, gespeel. Hy was intiem betrokke by die bestuur van die Gereformeerde gimnasium en die Normaalskool aldaar en dit was onder sy leiding dat die Normaalkollege in 1926 en die gimnasium in 1936 deur die Kaapse Provinsiale Administrasie oorgeneem is.

 

Ds. Venter het in die sentrum gestaan van die polemiek en bewysvoering dat Bulhoek, die plaas van Douw Gerbrand Steyn in die [[Steynsburg]]se distrik, die geboorteplek van pres. [[Paul Kruger|S.J.P. Kruger]] was. Hy het oudhede versamel en 'n museum in die huis op Bulhoek ingerig. Hy het ook versamelstukke aan die Voortrekkermonument-museum in [[Pretoria]] en die Nasionale Museum in [[Bloemfontein]] geskenk.

 

Hy was letterkundig en musikaal begaafd en het 'n sangkoor op Steynsburg gelei. Sy geskrifte sluit onder meer die volgende populêre teologiese werke in: '' 'n Kort kerkgeskiedenis van Suid-Afrika vir katkisasie gebruik'' (Bloemfontein, 1923),'' Handleiding vir die Jongeliedevereniging op Gereformeerde grondslag'' (Potchefstroom, 1942) en ''Die vrou in die openbare lewe'' (Bloemfontein, s.j.).

 

Verder was hy deputaat vir die Calvyn Jubileum Boekefonds en voorsitter van die deputate vir sending in [[Venda]]land.

 

Gedurende 1926, aan die vooraand van die repatriasie na [[Suidwes-Afrika]], het hy die Afrikaners in [[Angola]] besoek en hom ook beywer vir die terugkeer van Afrikaners — onder wie verskeie oud-Steynsburgers — uit [[Argentinië]]. Gedurende die laaste dertig jaar van sy lewe is ds. Venter deur 'n gehoorgebrek gestrem. Hy is op Potchefstroom begrawe.

 

Ds. Venter was getroud met Johanna Margaretha, dogter van Barend Rudolf Kruger en sy vrou, Christina Maria van Tonder. Uit die huwelik is drie seuns en 'n dogter, Christina, gebore, wie se foto tydens die simboliese ossewatrek van 1938 die vroueprofiel in die groep op die wakis van die dikwels gebruikte afbeelding uitmaak. Die manuskrip van V. se ''Dagboek: reis na Angola'', asook 'n portretalbum en foto's, berus in die Argief van die Geref. Kerk in Potchefstroom.