Jura

Die Jura is ’n geologiese periode van die Mesosoïese Era en strek van die einde van die Trias sowat 201,3 miljoen jaar gelede tot die begin van die Kryt sowat 145 miljoen jaar gelede.

Groot dinosourusse het in die Jura voorgekom in woude met ewe groot konifers.

Die Jura is die middelste periode van die Mesosoïkum, ook bekend as die era van die reptiele. Die periode het begin kort ná die Trias-Jura-uitwissing. Nog twee groot uitwissings het voorgekom in die Jura, maar nie een word gereken onder die "Groot Vyf"-massauitwissings nie. Die Jura is genoem na die Jura-gebergte in die Europese Alpe, waar kalksteen-strata uit die periode die eerste keer ontdek is.

Teen die begin van die Jura het die superkontinent Pangaea uitmekaar begin dryf en twee landmassas, Laurasië in die noorde en Gondwana in die suide gevorm. Dit het die kuslyn verleng en die kontinentale klimaat verander van droog tot vogtig, en baie van die woestyne van die Trias is vervang deur reënwoude.

Op die land het die dierelewe verander van die Trias se oorheersende Dinosauromorpha en Crocodylomorpha tot een wat slegs deur dinosourusse oorheers is. Die eerste voëls het ook in die Jura hul verskyning gemaak nadat hulle uit ’n tak van die Theropoda ontwikkel het. Ander belangrike gebeurtenisse sluit in die verskyning van die eerste akkedisse en die evolusie van soogdiere. In die oseane het seereptiele voorgekom soos Ichthyosauria en Plesiosauria, terwyl Pterosauria die oorheersende vlieënde gewerweldes was.

Die plantegroei het meestal uit konifers bestaan.

• 
  ’n Pliosaurus (regs) en ’n Leedsichthys in die see.
• 
  Plesiosauria soos die Muraenosaurus was volop in die see.
• 
  Die Diplodocus, met lengtes van tot meer as 30 m, was algemeen.
• 
  Die Allosaurus was een van die grootste landroofdiere.
• 
  Die Stegosaurus was een van die mees herkende genera en het in die Middel-Jura geleef.
• 
  Die Archaeopteryx was die eerste bekende voël en het in die Laat-Jura voorgekom.

Eksterne skakels

• Voorbeelde van Jura-fossiele
• Palaeos.com
• Wikimedia Commons het meer media in die kategorie Jura.