Ikea: Verskil tussen weergawes

'''Ikea''' ([i'ke.a], handelsmerk: ''IKEA'') is 'n internasionale maatskappy wat die meubelbedryf met sy bekostigbare en slaan-dit-self-aan-mekaar-meubels gerewolusioneer het. Die winkelketting, wat in [[Swede]] gestig is, is tans ook die grootste vervaardiger van meubels wêreldwyd met 118 000 medewerkers en 'n omset van 19,8 miljard € in 2007.

 

Die maatskappy se katalogus, wat afbeeldings en pryse van IKEA-meubels, breekware, dekorartikels en ander ware bevat, is die grootste drukwerk ter wêreld.<ref>CAP&Design nommer 6 (2004)</ref> Die katalogus word in 17 tale en 38 uitgawes vir 28 lande met 'n totale oplaag van 191 miljoen eksemplare gepubliseer.<ref>[http://www.ikea.com/ms/en_US/customer_service/faq/faq.html#0104 ''www.ikea.com: Customer service'']</ref> Nuwe katalogusse verskyn jaarliks in Augustus of September.

 

Die meubelbedryf is oor 'n lang tydperk as 'n bedryf beskou wat deur 'n baie groot aantal plaaslike verskaffers en aanbieders oorheers word. Daar was gewoonlik 'n groter aantal meubelwinkels in stedelike sakekerne wat 'n groot verskeidenheid dienste aan verbruikers verskaf het. Meubels is meestal op bestelling en in klein hoeveelhede plaaslik vervaardig sodat verbruikers aan hoë prysvlakke en lang wagtye gewoond geraak het.

 

In teenstelling met sy mededingers in die meubelbedryf het IKEA 'n hoë vlak van vertikale integrasie bereik en stel nuwe standaarde ten opsigte van sy verskaffersnetwerk, sy logistiek en sy verkoopsaktiwiteite. IKEA het homself in die internasionale meubelbedryf veral as prysleier geposisioneer en oefen sodoende groot druk op sy mededingers en nabootsers uit. Die maatskappy bring kostebesparings teweeg wat dit in staat stel om baie produkte tussen 25 en 50 persent goedkoper as sy mededingers aan te bied. IKEA skenk hierby sowel aandag aan verbruikers se behoeftes aan bekostigbare meubilering asook verskaffers se belangstelling in groot produksiehoeveelhede.

 

Aanvanklik het Kamprad huishoudelike goedere en meubels per katalogus aan Sweedse klante verkoop. Reeds vanaf 1951 het IKEA hom uitsluitlik op meubels gekonsentreer - in 'n tydperk toe steeds minder Swede as gevolg van stygende pryse nog in staat was om meubels te kan bekostig. Kamprad het destyds begin om funksionele en goed ontwerpte meubels teen lae pryse te verkoop, en vanaf 1953 kon IKEA-meubels nie net in katalogusse nie, maar ook in 'n uitstalruimte in Älmhult besigtig word. Tegelykertyd het IKEA begin om sy meubels self te ontwerp. In 1958 is IKEA se winkel in Älmhult vergroot vir meer gerief en tot sy eerste groot meubelwinkel omgeskep. Dit was die hoeksteen vir 'n vinnig groeiende sakeonderneming.

 

In 1963 het die eerste IKEA-meubel buite Swede in die buurland [[Noorweë]] geopen, en ses jaar later het IKEA ook na die [[Denemarke|Deense]] mark uitgebrei. Nadat die Sweedse meubelmark in die vroeë 1970's versadig geraak het, het Kamprad geprobeer om nuwe afsetmarkte buite [[Skandinawië]] te vind. In 1973 is 'n meubelwinkel op die [[Switserland|Switserse]] mark geopen wat destyds as baie moeilik vir nuwe mededingers beskou en sodoende opsetlik as toetsmark gekies is. IKEA se onkonvensionele styl was onmiddellik suksesvol, en die maatskappy het in die volgende jaar ook tot die Duitse meubelmark toegetree wat destyds in volume die grootste in Europa was - en uiteindelik tot IKEA se belangrikste buitelandse mark sou ontwikkel.

 

Teen die middel van die 1970's het IKEA begin om meubelwinkels in oorsese lande te open; die eerste hiervan is in 1975 in Australië ingewy. In die volgende jaar het IKEA as konsessiegewer tot die [[Kanada|Kanadese]] mark toegetree en die nodige plaaslike logistiek ontwikkel. Kamprad het aanvanklik geskroom om ook na die Amerikaanse mark uit te brei, en eers na baie oorweging is in 1985 vyf meubelwinkels in voorstede van metropole langs die ooskus geopen.

 

In [[Japan]] het IKEA in 2006 twee meubelwinkels geopen. Oorspronklik het IKEA reeds in 1974 via konsessiewinkels tot die Japannese mark toegetree, tog was die verkoopsyfers aanvanklik so laag dat die Swede hul aktiwiteite hier in 1986 heeltemal gestaak het. Die tweede poging om na Japan uit te brei is deur IKEA self bestuur, en ook op hierdie moeilike mark is die behoeftes van plaaslike verbruikers ontmoet: 'n groot verskeidenheid bykomende dienste word aangebied, terwyl die meubels aan die kenmerkende klein Japannese woonstelle aangepas word.

 

Ná die Duitse en Switserse markte het IKEA in die laat 1970's ook na ander Europese lande uitgebrei, waaronder [[Oostenryk]] (1977), Nederland (1978), [[Frankryk]] en [[Ysland]] (1981) en [[België]] (1984). Ná die opening van sy eerste winkel naby [[Londen]] in die [[Verenigde Koninkryk]] (1987) het IKEA in 1992 in 'n verrassende stap die Britse meubelwinkelketting ''Habitat'' oorgeneem wat hom in sy relatief klein winkels net soos IKEA op moderne meubels gespesialiseer het, maar daarnaas ook uitgebreide dienste aan sy klante verskaf het. ''Habitat'' is as 'n selfstandige handelsmerk bewaar en tans in besit van die IKANO Group wat deur die Kamprad-gesin oorheers word.

 

Die Sentraal- en Oos-Europese markte was ná die val van die [[Ystergordyn]] belangrik genoeg vir IKEA, tog het die Swede vanweë die aanvanlike politieke instabiliteit besluit om eers konsessiewinkels te open. In [[Hongarye]] is die eerste meubelwinkel naby [[Boedapest]] in 1990 in samewerking met 'n plaaslike winkelketting geopen. 'n Kort tyd later het IKEA ook die aandele van sy vennote oorgeneem. Die winkels wat in 1991 in [[Pole]] en die destydse Tsjeggoslowakye geopen is, is deur IKEA self bestuur. Later het winkels in [[Rusland]] (2000) en [[Portugal]] (2004) gevolg. In [[Roemenië]] het IKEA weer die voorkeur aan 'n konsessiesaak gegee wat in 2007 in samewerking met 'n Roemeense ondernemer gestig is.

 

IKEA het ook sy netwerk van internasionale verskaffers steeds verder uitgebrei - in 2006 was daar reeds sowat 1&nbsp;300 leweransiers in 53 lande wat almal met die oog op lae koste gekies is. 'n Groot persentasie van IKEA se artikels word in lande met lae loonvlakke vervaardig, waarby die meeste komponente uit die Volksrepubliek van Sjina (18 persent), Pole (14 persent), Italië (8 persent), Swede (7 persent) en Duitsland (6 persent) ingevoer word. Die benodigde onderdele vir 'n meubelstuk of ander artikel word dikwels deur 'n groot verskeidenheid verskaffers in verskillende lande vervaardig. Daar is dikwels ook ongewone vorme van samewerking - 'n ski-vervaardiger het reeds tafels vir IKEA vervaardig, terwyl 'n hemde-produsent kussingoortrekke aan IKEA verskaf het.<ref>Schmid/Kretschmer (2007), bl. 313</ref>

 

 

== Verwysings ==

 

[[Kategorie:Sweedse maatskappye]]