John Hofmeyr: Verskil tussen weergawes

Aangesien hy reeds vroeër sy begeerte tekenne gegee het om hom as die eerste verteenwoordiger van die Vrystaatse Kerk aan die Sending in [[Njassaland]] te wy, het hy kort ná die proponentseksamen na [[Londen]] vertrek om met die oog op sy toekomstige werk 'n jaar lank medisyne aan die Livingstone-kollege te studeer. By sy terugkeer het hy etlike Vrystaatse gemeentes besoek en oor sy werk toegespreek en op [[18 Februarie]] [[1899]] is hy op [[NG gemeente Winburg|Winburg]] georden. Sy vader het die ordeningsrede uitgespreek oor Eks. 33:14, aan die einde waarvan hy onder meer gesê het: “Ik acht mij gelukkig, mijn zoon, dat ik u heden in de heilige evangeliebediening mag verwelkomen.” Eerw. [[Andries Dreyer]] skrif in die gemeente Somerset-Oos se 110-jarige gedenkboek: “Seker was dit vir die vader 'n blye dag en nie minder vir die moeder nie.” Die eintlike afvaardiging het 'n paar maande later onder blyke van groot belangstelling op Somerset plaasgevind en daarop het die jeugdige predikant-sendeling na sy bestemming vertrek.