Marlize Hobbs: Verskil tussen weergawes

'''Marlize Hobbs''' is 'n Suid-Afrikaanse skrywer en is op 14 Mei 1972 op ʼn plaas in die omgewing van [[Louwna]]<ref>NB-Uitgewers: http://www.nb.co.za/Authors/8403 </ref> gebore as een van ʼn tweeling.

Haar tweelingbroer se naam is Ben. Sy word groot op haar geboorteplaas en gaan tot standerd vyf skool op Laerskool Louwna, wat net vyftig leerlinge en drie onderwysers gehad het. In standerd vyf word sy met epilepsie gediagnoseer. Sy voltooi matriek aan die [[Hoërskool Vryburg]] in die [[Noord-Kaap]]. Daarna is sy vanaf 1991 vir twee jaar lank sendeling in Hillbrow by die Middestad-Evangelisasie en Sendingaksie. Sy studeer dan maatskaplike werk aan die [[Randse Afrikaanse Universiteit]] en skryf in hierdie tyd vir ''Heraut'' se Kunsredaksie. Terwyl sy op universiteit is, bly sy in die koshuis. Na universiteit werk sy vir ʼn ruk in ʼn plaaswinkel om geld te verdien en hierna reis sy rond vir twee jaar. In hierdie tyd ontmoet sy vir Jeanne Goosen, vir wie sy van haar gedigte stuur. Dit is die begin van ʼn lang mentorskap. In 1998 en 1999 werk sy as televisie produksie assistent in [[Durban]] by Heine TV-produksies. Dan word sy vir vier jaar ʼn maatskaplike werker in die woonbuurt Ganyesa sowat tagtig kilometer buite Vryburg. In hierdie hoedanigheid is sy veral verantwoordelik vir die opstel van voorvonnis-verslae vir die hof. Op Ganyesa is sy die enigste wit persoon in die kantoor en bly sy in een van die tien huise op die dorp, wat sy van die plaaslike hospitaal huur. In 2002 kry sy ʼn oorplasing na Vryburg en later word sy maatskaplike werker vir Noordwes se regering op [[Potchefstroom]]. Sy ly aan epilepsie en raak dan verslaaf aan dwelms, waarna sy haar aanmeld vir behandeling om die gewoonte af te skud. Na die sukses van haar debuutbundel tree sy per geleentheid op as aanbieder by die Winterskool van die Kreatiewe Skryfskool van die [[Universiteit van Pretoria]] en by die Sanlam Aanlynskryfskool<ref>Bookslive: http://joho.bookslive.co.za/blog/2009/10/08/marlizve-hobbs-author-of-flarde-experiments-with-online-publishing/ </ref> op [[LitNet]]<ref>LitNet ATKV-Skrywersalbum 30.03.2011: www.litnet.co.za </ref>. Sy neem ʼn wees swart kind aan as haar eie.

Terwyl sy werkloos is skryf sy ʼn soort tuisgemaakte koerant wat sy vir vriende aanstuur, wat sy “''Flardes uit die vlaktes''” noem. Daarin plaas sy stories en advertensies wat sy self uitdink. So neem die idee vir ʼn boek vorm by haar aan. Haar debuut maak sy met die novelle “'''''Flarde'''''”<ref>Burger, Willie “Beeld” 1 Augustus 2005; Viljoen, Louise “Rapport” 12 Junie 2005</ref>, die verhaal van die maatskaplike werker Lisa van Ganyesa en die inwoner Mama Minoto wat hoenderpote verkoop om aan die lewe te bly.<ref>Loots, Sonja Rapport: http://152.111.1.87/argief/berigte/rapport/2005/05/15/RP/4/01.html </ref> As maatskaplike werker raak Lisa diep betrokke by die gemeenskap se diepste probleme, soos gesinsgeweld, dronkenskap, verraad, vigs en armoede. Flardes van verhale word aan haar vertel en sy moet probeer sin maak daaruit, maar soms verstaan sy die situasie heeltemal verkeerd.<ref>Greeff, Rachelle Rapport: http://152.111.1.87/argief/berigte/rapport/2006/06/18/R1/25/01.html </ref> Dit alles terwyl sy steeds probeer om die flarde van haar eie lewe bymekaar te maak. “''Flarde''” verower in 2006 die Eugène Marais-prys en in dieselfde jaar word die Universiteit van Johannesburg-prys vir debuutwerk en die [[Jan Rabie]]/Rapport-prys vir innoverende Afrikaanse prosa ook aan hierdie boek toegeken.<ref>Steinmair, Deborah LitNet: http://www.oulitnet.co.za/mond/steinmair_hobbs.asp </ref> Die boek word geprys vir sy tegniese vernuf, besonderse aanwending van taal en die oorspronklikheid daarvan. “'''''Score my ʼn gwai'''''”<ref>De Villiers, Elizabeth “Rapport” 1 September 2013; Fitzpatrick, Marida “Beeld” 23 September 2013</ref><ref>Hambidge, Joan Woorde wa weeg: http://joanhambidge.blogspot.co.za/2013/10/marlize-hobbs-score-my-n-gwai-2013.html </ref> het twee vertellers, naamlik Miesa, ʼn wit meisie wat in die laat sewentigerjare op ʼn plaas in Noordwes grootword, en Siena Maamogwe, die Tswana-vrou wat haar grootmaak. <ref>Green, Phyllis Sarie: [http://www.sarie.com/lewe-liefdes/marlize-hobbs-gesels-oor-score-n-gwai/#/popup http://www.sarie.com/lewe-liefdes/marlize-hobbs-gesels-oor-score-n-gwai/]</ref>Siena is meer ʼn ma vir Miesa as wat haar regte ma is. Miesa is anders, want sy leef in haar eie verbeeldingswêreld terwyl sy worstel met haar lesbiese seksualiteit. Sy wonder gedurig wie sy is, hoekom sy is soos wat sy is, of sy werklik só is en of sy haar dit net verbeel. Die groot wending in Miesa se lewe het gekom toe haar pa terugkeer van die grens, totaal anders as wat hy voorheen was. Ook by hom is daar ʼn identiteitsverandering en hy begin vir Miesa, toe slegs nege jaar oud, in die nag verkrag. Siena is die enigste mens wat vir Miesa werklik raaksien en agterkom wat gebeur. Miesa se identiteit word gevorm nie net deur haar andersheid nie, maar ook deur die mense wat sy ontmoet, soos Siena, ouma Marie, Leona wat haar gevange hou in ʼn obsessiewe liefdesverhouding, en uiteindelik Jasmyn, wat sy op die internet ontmoet en wat haar dadelik uitpluis. Identiteit is ook by Jasmyn ʼn tema. Sy is nie gay nie, maar raak op Miesa “se siel verlief”. Uiteindelik is daar Miesa se aangenome dogter, Naledi, wat outisties is en dus haar eie afstandigheid van die wêreld beleef. Siena leef baie nader aan die wêreld met haar praktiese lewensuitkyk. Sy worstel nie met haar identiteit nie, maar help vorm aan Miesa s’n. Hierdie boek is in 2014 op die kortlys vir die toekenning van die KykNet-Rapport-prys in die rolprentkategorie.