Izak Krüger: Verskil tussen weergawes

Izak Krüger, kleinseun van die stigters van die [[Gereformeerde kerk Colesberg]] [[Izak David du Plessis|I.D.]] en [[Hester Venter|Hester du Plessis]], het op [[Burgersdorp]] skoolgegaan en sy teologiese opleiding geniet aan die [[Teologiese Skool Burgersdorp]]. Hy en ds. [[Pieter Bingle|P.W. Bingle]] was die laaste twee studente wat hul teologiese studie onder prof. [[Jan Lion Cachet]] voltooi het voor die ou professor se aftrede op [[1 Mei]] [[1911]]. Krüger het dus einde 1904 saam met die Teologiese Skool van Burgersdorp na [[Potchefstroom]] verhuis ná ’n Sinodebesluit van 1904. Oor dié verhuising sou hy 40 jaar later skryf: "Die teenstelling tussen die twee dorpe was vir óns, Kaaplanders, baie groot: die Karoo-dorp en die Mooirivier-dorp, oud-hoofstad van Transvaal. Die één lê weggesteek in ‘n hol diepte aan die voet van ‘n bergreeks, die ander oop en bloot, onder skoot van die eerste sonstrale; die één is geleë in ‘n droë streek, die ander langs die some van die Mooirivier met sy byna onafsienbare rye treurwilgers; die één met dig bymekaar geboude huise, die ander met groot erwe, dun uitgerek, al langs die Mooirivier af; die één met stowwerige strate, die ander met grasbegroeide of –omsoomde strate. Maar … hoe groot die teenstelling in die guns van laasgenoemde ook al was, tóg was daar heimwee na die ou tuiste in die hart, en het meer as een student destyds gesug: Oos, Wes, Tuis Bes!"<ref>{{af}}[http://dspace.nwu.ac.za/bitstream/handle/10394/683/Afdeling1.pdf.txt?sequence=8 Sages en gebeure]. URL besoek op 10 November 2016.</ref>