Choanoflagellatea

Choanoflagellatea is ’n klas vrylewende, eensellige en koloniale eukariotiese sweepdiertjies wat beskou word as die naaste lewende verwante aan diere.

Choanoflagellatea
Wetenskaplike klassifikasie
Domein:	Eukaryota
Koninkryk:	Protista
Klas:	Choanoflagellatea Cavalier-Smith, 1998
Families
Codonosigidae Salpingoecidae Acanthoecidae

Beskrywing

Choanoflagellatea is sweepdiertjies met ’n tregtervormige kraag van gekonnekteerde mikrovilli (uitstulpings) aan die basis van elke flagellum (sweephaartjie). Hulle het ’n besonderse selmorfologie wat gekenmerk word deur ’n ronde of ovaal selliggaam van 3 tot 10 µm in deursnee met ’n enkele flagellum aan die punt wat omring word deur ’n kraag van 30 tot 40 mikrovilli (sien skets).

Die beweging van die flagellum skep waterstrome wat die organisme deur die waterkolom stu. So vang hy bakterieë en ander kosbrokkies teen die kraag van mikrovilli vas, waar dit ingeneem word. Hierdie voeding verskaf ’n kritieke skakel binne die globale koolstofkringloop en verbind trofiese vlakke (vlakke in die voedselketting).

Benewens hul belangrike ekologiese rol, is Choanoflagellatea van besondere belang vir evolusionêre bioloë wat die oorsprong van veelselligheid in diere bestudeer. As die naaste lewende verwante aan diere dien Choanoflagellatea as ’n nuttige model vir rekonstruksies van diere se laaste eensellige voorsaat.

Etimologie

Die naam kom van die Griekse woord khoanē, "tregter" (vanweë die vorm van die kraag), en die Latynse woord flagellum.

Eksterne skakels

• Wikispecies het meer inligting verwant aan Choanoflagellatea

• Wikimedia Commons het meer media in die kategorie Choanoflagellatea.
• Hierdie artikel is vertaal uit die Engelse Wikipedia