Limerick

Limerick ([ˈlɪmrɪk], [-mərɪk]; Iers: Luimneach [ˈl̪imʲɨnʲəx]) is 'n stad in die gelyknamige Ierse graafskap, geleë aan die Shannonrivier. Die historiese middestad het op die eiland King's Island ontstaan wat deur die Shannon- en Abbeyrivier omsluit word. Die Shannonrivier mond naby Limerick in die Atlantiese Oseaan. Met 'n bevolking van 94 192 volgens die sensus van 2016 is Limerick die derde grootste nedersetting in die Ierse Republiek en die vierde grootste op die eiland Ierland.