Piet Cloete: Verskil tussen weergawes

[[Lêer:Dr Piet Cloete.jpg|duimnael|Dr Piet (Petrus Cornelius) Cloete, 1928-1991]]

Dr. '''Petrus Cornelius (Piet) Cloete''' ([[14 Julie]] [[1928]] – [[21 September]] [[1991]]) was van 4 Februarie 1961 tot 30 Maart 1980 predikant in vier [[Nederduitse Gereformeerde Kerk|NG gemeentes]] en van 1 April daardie jaar tot hy sy emeritaat op 22 Junie 1988 ontvang het, predikant in sinodale diens met opdrag ampsbediening en evangelisasie in die [[NG Kerk Vrystaat|NG Kerk in die OVS]]. Hy het die Vrystaatse Kerk sedert 1962 op 'n wye terrein gedien en staan onder andere bekend as die eerste predikant in die provinsie wat in 1967 met die kleingroepbespreking in wyksbyeenkomste begin het.

 

Cloete het op 'n plaas by [[Niekerkshoop]] grootgeword (waar hy ook gebore en gedoop is) en moes die Hoërskool Griekwastad in st. 8 verlaat ná sy pa se dood. Deur deeltydse studie, terwyl hy werksaam was by die Suid-Afrikaanse Spoorweë en Hawens en die departement van justisie, kon hy sy matriek in 1947 behaal. Sewe jaar later het hy voltyds op [[Stellenbosch]] gaan studeer. Nadat hy sy studie aan die [[Kweekskool]] voltooi het, is hy in 1960 gelegitimeer.

 

Sy eerste gemeente was [[NG gemeente Johannesburg-Oos|Johannesburg-Oos]], die sogenaamde Irenekerk, waar hy op 4 Februarie 1961 bevestig is, destyds nog in die ou kerk wat vroeg in die 1970's afgebreek is. Ná net meer ’n jaar is hy in April 1962 Vrystaat toe as predikant van die NG gemeente Vrede-Wes, en in April 1967 na [[Bloemfontein]] as leraar van die NG gemeente Hugenoot. In dié tyd het hy die grade M.A. en D.Phil. (1972) aan die Universiteit van die Vrystaat behaal. Sy D.Phil.-skripsie, met die titel, "[http://scholar.ufs.ac.za:8080/xmlui/handle/11660/2333 Grondbeginsels van die normatiewe estetika]", is onder leiding van prof. P de B Kock afgehandel.

 

Tien jaar later, in Januarie 1977, stig hy saam met die NG gemeente Noordrand af en word hul eerste predikant. Eindelik aanvaar hy op [[1 April]] [[1980]] die amp as predikant in sinodale diens: ampsbediening en evangelisasie van die Vrystaatse NG Kerk. Intussen was hy ook vir 'n termyn aktuarius van die Vrystaatse Sinode.

 

Weens swak gesondheid moes hy op [[22 Junie]] [[1988]] sy [[emeritaat]] aanvaar, maar toe die sinodale kommissie besluit om sy pos tydelik te bevries, het hy ingestem om die werk deeltyds voort te sit tot die Vrystaatse Sinode weer in September 1991 sou vergader. Midde-in swak gesondheid en voortdurende mediese behandeling het hy die werk vlot laat verloop, aldus ds. J.F. le Roux in die NG Kerk se Jaarboek 1992.