Andrew Motjuoadi

Andrew Tshidiso Motjuoadi (1935 – 1968) is in die destydse Pietersburg gebore, maar hy het later in Mamelodi, Pretoria, gewerk en gewoon. Soos talle ander Swart Suid-Afrikaanse kunstenaars het hy homself geleer skilder. Hy het sy eerste uitstalling in 1963 in Johannesburg gehou. Hoewel hy 'n belese man was (hy het vir 'n BSc-graad aan die Universiteit van die Noorde gestudeer), het hy geglo dat hy deur 'n toordokter getoor is en nie lank sou leef nie. Hy is inderdaad in 1968 oorlede nadat hy in 1967 'n beroerteaanval gehad wat hom verlam het en hy mediese behandeling geweier het.

Gedurende sy kort kunsloopbaan het Motjuoadi heelwat erkenning vir sy werk ontvang. In 1964 het hy 'n opdrag vir die Amerikaanse filmregisseur Cornel Wilde uitgevoer.

Wilde was in Suid-Afrika om die rolprent The Naked Prey te vervaardig en het Motjuoadi gevra om skilderye vir die agtergrond van die erkenningslys te maak. In 1965 is Motjuoadi genooi om aan 'n uitstalling van Afrika-kuns in Londen deel te neem en in 1966 het hy 'n toekenning as die beste kunstenaar van kleur ontvang in 'n wedstryd vir bekende en belowende kunstenaars in Johannesburg. Motjuoadi het egter so 'n afgesonderde lewe gelei dat hy eers 6 maande ná die toekenning aan hom gemaak is, toevallig daarvan te hore gekom het.

Motjuoadi was 'n townshipkunstenaar: Sy onderwerpe was die mense en tonele in sy onmiddellike omgewing, soos uitgehongerde honde, kaartspelers op straat, fluitspelers, en armoede. Hy was 'n uitstekende tekenkunstenaar en het alles tot in die fynste besonderheid weergegee. Hoewel sy werke soms skokkende toestande onthul het, was dit nooit geromantiseer of geïdealiseer, verwronge of sentimenteel nie. Hy het die townshiplewe met simpatie en meelewendheid weergegee.