Teen die einde van die 1950's was daar dan sewe gemeentes in die suide van Johannesburg waar daar tot 20 jaar vantevore net een was. [[NG gemeente Suid-Rand|Suid-Rand]] (1950) was die grootste van die sewe gemeentes met 1 121 belydende lidmate, gevolg deur die 1 058 van [[NG gemeente Johannesburg-Suid|Johannesburg-Suid]], wat ook in 1950 afgestig het, maar van Turffontein. Derde was Turffontein (1906) met 841, vierde Rosettenville (1938) met 827 en vyfde [[NG gemeente Townsview]] (1953) met 816. Klipriviersberg was die kleinste met 624 belydende lidmate.
Weens ingrypende demografiese veranderinge in binne die oorspronklike gemeentegrense van Rosettenville was dit dié gemeente wat eerste [[Lys van ingelyfde NG gemeentes|ingelyf]] is, en wel vroeg in die 1970's by Klipriviersberg. Klipriviersberg, wat toe nooit 'n kerk gebou het nie, het die kerk en saal van Rosettenville oorgeneem, terwyl die Nederduitsch Hervormde gemeente Johannesburg-Suid, gestig op [[13 November]] [[1953]], Klipriviersberg se saal en aanliggende grond gekoop het. Daarop het hulle 'n kerk gebou waarvan ds. J.J. du Toit die hoeksteen op [[13 September]] [[1975]] gelê het. In die tweede helfte van die 1990's is ook Suid-Rand by Klipriviersberg ingelyf, wat in 1998, ná die inlywing, 180 doop- en 680 belydende lidmate gehad het. Die gemeente het toe die Rosettenville-kerk en -saal verkoop en Suid-Rand se gebou in [[South Hills]] betrek. Twintig jaar later het die dooplidmate negevoudig afgeneem tot net 20 en die belydende lidmate met amper 60% tot 294, amper 10 keer minder as die drie samestellende dele se 2 572 belydende lidmate omstreeks 1957, 60 jaar vantevore.
