'''Langlaagte''' is een van die plase waarop die [[Witwatersrand]] aangelê is, maar dis veral van belang omdat dit hier was dat [[Suid-Afrika]] se goudmynbedryf begin het met die ontdekking deur die [[Australië|Australiese]] myner [[George Harrison]] van die [[goud]]draende konglomeraat, wat daarna geblyk het die hoofrif van die [[Witwatersrand]] te wees.
Langlaagte is ook die naam van ’n voorstad 5 km wes van die stadsaal. In die middel van die 20ste eeu was dit 'n oorwegend Afrikaanssprekende gebied. In 1934 was hier byvoorbeeld net 26 Afrikaanssprekende munisipale kiesers, maar 333 Engelssprekend. Teen 1949 het die Afrikaanse kiesers toegeneem tot 584 en die Engelse afgeneem tot 201. Teen 1961 was die getalle 742 Afrikaans en 288 Engeks. Die aanliggende Paarlshoop was selfs meer oorwegend Afrikaans, want teen 1961 was net 29 van die kiesers Engelssprekend, maar 461 Afrikaanssprekend.
Vir sensusdoeleindes word ditdie voorstad Langlaagte saam met [[Paarlshoop]] gegroepeer onder daardie voorstad se naam. [[Langlaagte-Noord]] word wel afsonderlik erken. Die voorstad Langlaagte is noordwes van [[Booysens Reserve]] en oos van [[Industria, Johannesburg|Industria]] en [[Riverlea]]. In die ooste grens Langlaagte aan [[Paarlshoop]] en [[Homestead Park]], wat op sy beurt grens aan [[Mayfair, Gauteng|Mayfair]], wat in 1896 op die plaas aangelê is. Benewens dié voorstede is [[Crosby, Gauteng|Crosby]] deels op Langlaagte aangelê en deels op die plaas [[Middelfontein (plaas)|Middelfontein]]. Die plase waaraan Langlaagte gegrens het, was in die noordweste [[Waterval (plaas)|Waterval]], in die noorde Middelfontein en [[Braamfontein (plaas)|Braamfontein]], in die ooste [[Turffontein (plaas)|Turffontein]], in die suide Mooifontein en in die ooste Klein-Paardekraal.
Die hoofrif strek van [[Randfontein]] in die weste tot by [[Springs]] in die ooste met Langlaagte min of meer in die middel. Al die gouddorpe en -stede lê op dié lyn.
