Wiesbaden: Verskil tussen weergawes

Die genesende krag van Wiesbaden se warmbaddens is reeds deur die [[Romeinse Ryk|Romeine]] gewaardeer. Met altesaam vyftien warm- en mineraalbaddens is Wiesbaden een van die oudste badoorde in [[Europa]]. Die stad se gesondheids- en spabedryf het veral in die 18de en 19de eeu gefloreer toe badoordvakansies en warmbron-waterkure saam met die vermaakprogram, wat vir badgaste aangebied is, 'n belangrike sosiale gebeurtenis geword het. As een van die vernaamste badplase en kuuroorde op die vasteland, wat deur doeltreffende en ambisieuse stadsbeplanning en die versmelting van stedelike en landskapsargitektuur tot 'n luukse spa van wêreldfaam uitgebou is, het Wiesbaden befaamde badgaste soos [[Johann Wolfgang von Goethe]], [[Johannes Brahms]] en [[Fjodor Dostojefski]] asook talle lede van Europa se vernaamste vorstehuise gelok.