Afrikaanse sperwer: Verskil tussen weergawes

Die '''Afrikaanse sperwer''' (''Accipiter tachiro'') is 'n [[roofvoël]] en staan in Engels bekend as die ''African goshawk''. Dié roofvoël word dikwels misgekyk aangesien hulle in digte plantegroei jag. Hulle is meer opsigtelik wanneer hulle soggens vroeg oor die boomtoppe vlieg en herhalend roep.

 

Hierdie [[spesie]] se hele borskant is dwarsgestreep, dit het nie wit aan die kruis nie en die geel oog en grys washuid onderskei volwassenes van ander valke wat amper so lyk. Die [[Kleinsperwer]] is 'n soortgelyke spesie.

 

Die geslagte is hoogs [[dimorfisme|dimorfies]]; mannetjies is kleiner, het 'n blouerige grys rugkant en rooibruin dwarsstrepe oor die borskant, en twee wit kolle op die stert (soos die [[Kleinsperwer]]); wyfies is groter, bruin aan die rugkant, het bruin dwarsstrepe oor die borskant en kolle is afwesig op die stert. Jong voëls het duidelike vlekke aan die borskant en word van jong Kleinsperwers onderskei aan die grys washuid, en van jong [[Koekoekvalk]]e aan die kleiner vorm, langer bene en afwesigheid van 'n kuif. Die voël is 36 tot 46 cm lank.

 

Hul roep is 'n lawaaierige, kort 'whiet'- of 'tjip'-geluid in vlug of vanuit 'n uitkykpos. Wyfies het 'n miaauende 'kieeoee'- roep. Duiwe en Tiptolle vorm hulle vernaamste prooi en word met 'n duikslag uit versteekte uitkykplekke gevang.

 

Dit is 'n algemene standvoël van immergroen- en rivierwoude, boswêreld met groot bome en boomryke voorstede. Dié roofvoël sal tuine besoek met groot lowerryke bome en digte plantegroei. Weens hul kosvereistes sal 'n goeie bevolking kleiner voëls en [[reptiel]]e daartoe lei dat die Afrikaanse sperwer gereeld kom besoek aflê in die tuin en soms ook 'n broeibewoner word.

 

Afrikaanse sperwers bou hul neste bo in hoë bome. Hoewel neste soms slegs vier meter bo die grond gebou word, is die gemiddelde hoogte van die Afrikaanse sperwer se nes nader aan agt meter. Hulle het 'n voorkeur vir die inheemse [[flora]] soos ''[[Ficus]]'', ''[[Mingerhout|Breonadia]]'' en ''[[Syzygium]]'' maar hou ook van uitheemse bome soos bloekoms (''[[Eucalyptus]]''). Die nes is 'n platform van stokkies wat uitgevoer word met groen blare, soortgelyk aan dié van 'n Kleinsperwer. Die broeiseisoen strek van September tot November, maar is oorwegend in Oktober. Die getal eiers is 2 tot 3, en die broeitydperk is sowat 35 dae. Die kuikenstaduim is ongeveer 35 dae.

 

* [[Lys van Suider-Afrikaanse voëls volgens wetenskaplike name]]

 

{{Verwysings}}