Uniegebou

Die 'Uniegeboue is gebou op Meintjieskop, Pretoria, en is die amptelike setel van die Suid-Afrikaanse regering. Dit bevat ook die kantore van die President van Suid-Afrika. Dit word seker bes onthou as die plek waar Suid-Afrika se eerste demokraties-verkose president, Nelson Mandela, in Mei 1994 ingehuldig is.

Hierdie pragtige geboue, wat uit ligte sandsteen gebou is, is ontwerp deur die argitek Sir Herbert Baker in die Engelse monumentstyl, en is 275 m lank. Dit is halfrond gebou, met die twee sye wat die Afrikaner- en Engelse dele van die bevolking voorstel.

Die hoeksteen is in November 1910 gelê, kort nadat die Unie van Suid-Afrika — waarna die geboue vernoem is — gevorm is. Dit het 1 265 werkers meer as drie jaar geneem om te bou, en is in 1913 voltooi teen 'n totale koste van £1,310,640 vir die gebou en £350,000 vir die terrein.

Ook van belang is die pragtige tuine, bestaande uit slegs inheemse plante, wat die geboue omring asook die 9 000-sitplek amfiteater.