Mariageboorte: Verskil tussen weergawes

Content deleted Content added
Nuwe artikel
(Geen verskil)

Wysiging soos op 20:00, 25 Augustus 2019

Die fees Maria-Geboorte word in die kerkjaar van die Rooms-Katolieke Kerk, die Oosters-Ortodokse Kerk en die Anglikaanse Kerk op 8 September gehou. Dit herdenk die geboorte van Maria, die moeder van Jesus van Nasaret.

Die geboorte van die geseënde Maagd Maria, skildery deur Giotto, in die Scrovegni-kapel, Padua, Italië (ca. 1305)
Maria-Geboorte (1486–1490), fresko deur Domenico Ghirlandaio (1449–1494)

Die moderne Bybelse kanon verwys nie eksplisiet na Maria se geboorte nie. Die vroegste bekende beskrywing na Maria se geboorte is in die Proto-Evangelie van Jakobus (5,2), 'n apokriewe boek uit die laat tweede eeu, waar haar ouers, Sint Anna en Sint Joachim genoem word, te vinde.[1]

In die geval van heiliges herdenk die Rooms-Katolieke Kerk hul sterfdatum, met Sint Johannes die Doper en Maria wie se geboortedatums ook herdenk word. Die rede hiervoor is die unieke sending wat elkeen in die verlossingsgeskiedenis gehad het,[2] maar tradisioneel ook omdat hulle (nes die profeet Jeremia, Jeremia 1,5[3]) vanaf geboorte heilig was (Maria weens die Onbevlekte Ontvangenis; Johannes is volgens die tradisionele interpretasie van Lukas 1,15 in Sint Elizabeth se baarmoeder geheilig.[4]

Toewyding aan die onskuld van Maria onder hierdie Mariatitel word in baie kulture oor die hele wêreld gevier. Tientalle kerke is aan die leerstelling van Maria-Geboorte gewy.

Geskiedenis

Die fees ontstaan aan die einde van die 5de eeu uit die inwydingsfees van die hedendaagse Sint-Anna-kerk in Jerusalem, 'n basilika, wat op die tradisionele geboorteplek van Maria opgerig is. In die 7de eeu is die fees van die Geboorte van Teotokos ("Godbaarder") in die kerke van beide die ooste en die weste gehou.[5] Volgens die datum van Maria-Geboorte is later die datum van die – jonger – hoogfees Maria Onbevlekte Ontvangenis op 8 Desember, nege maande voor 8 September, bepaal. Saam met Maria-Geboorte het Pous Sergius I die Mariafeeste Maria-Boodskap, Maria-Ligmis en Mariahemelvaart ingestel.

Verwysings

  1. (en) Roten S.M., Johann G., The History of the Liturgical Celebration of Mary's Birth Geargiveer 9 September 2012 op Wayback Machine
  2. (en) Valentini, A. "Birth of Mary", Dictionary of Mary, Catholic Book Publishing Company, New York, 1985
  3. (af) "Jeremia 1,5". Bybel: Jeremia. Bybelgenootskap van Suid-Afrika. Besoek op 25 Augustus 2019. Voordat Ek jou in die moederskoot gevorm het, het Ek jou geken; voordat jy gebore is, het Ek jou aan My gewy en jou as profeet vir die nasies aangestel.
  4. (af) "Lukas 1,15". Bybel: Evangelie volgens Lukas. Bybelgenootskap van Suid-Afrika. Besoek op 25 Augustus 2019. want hy sal groot wees in die oë van die Here. Wyn en bier sal hy glad nie drink nie, en reeds van sy geboorte af sal hy met die Heilige Gees vervul wees.
  5. (fr) Charles Renoux: L'Hymnaire de Saint-Sabas (Ve–VIIIe siècle), Band 2 (Patrologia Orientalis 53, 1). Turnhout 2015, 579-588

Eksterne skakels