Wikus du Toit: Verskil tussen weergawes

'''Wikus du Toit''' is ’n senior lektor in Filmmusiek aan AFDA (South African School of Motion Picture and :ive Perfomance) en ’n [[Afrikaans]]e [[akteur]] en [[dramaturg]].

Johannes Lodewikus du Toit is op 18 Junie 1972 in [[Bethal]] in [[Mpumalanga]] gebore. Hy gaan op sy geboortedorp skool en matrikuleer aan die Hoërskool Hoogenhout. Na sy nasionale diensplig aan die Lugmaggimnasium op [[Valhalla]] naby Pretoria, voltooi hy sy Graad VIII Musiekeksamen aan die Universiteit van Suid-Afrika. Hy studeer aanvanklik argitektuur, maar verander dan van studierigting en skakel oor na Drama. Hy skryf in vir die Nasionale Diploma in Drama aan die Technikon Pretoria (later die Tshwane Universiteit van Tegnologie) en behaal hier sy B.Tech. Drama-graad en sy M.Tech. Drama-graad (cum laude) oor die ontwikkeling van kabaret in Suid-Afrika. Daarna woon hy kursusse in koormusiek by aan die Universiteit van Graz in [[Oostenryk]] en hy studeer ook onder John Kander (van “''Chicago''”-faam) aan die [[New York (dubbelsinnig)|New York]] Universiteit.

Benewens akteur is hy ’n besonder veelsydige kunstenaar wat sy merk maak as komponis, sanger en skrywer. As akteur tree hy op in meer as vyftig verhoogproduksies, tien televisiereekse en vier films. Van sy rolle op televisie sluit in “''Egoli''” en “''Proesstraat''” en op die verhoog tree hy op in onder andere “''Brakanjan''”. Verder vertolk hy rolle in die rolprente “''Stander''”, “''A case of murder''” en “''Semi-soet''”. Hy is die wenner van Vita Toekennings in 2001 as akteur vir sy spel in “''El Grande de Coca-Cola”'' en in 2002 in “''play@risk''”. In 1995 kry hy ook ’n [[Afrikaanse Taal- en Kultuurvereniging|ATKV]] [[Crescendo]] Toekenning vir sang. Verder is hy betrokke in regie en kry twee Aardvark-nominasies by die [[Aardklop|Aardklop-Kunstefees]] vir sy teks en regie van Elzabé Zietsman se vertoning “''smallchange”.'' Hy dien per geleentheid op [[InniBos|Innibos]]-Kunstefees se keuringspaneel, is ’n beoordelaar vir die [[KKNK]] se Kanna-pryse en is ook ’n [[Sama|SAMA]]-beoordelaar. As musiekresensent werk hy by ''Rapport Tydskrif'' waar hy die rubriek “''Popmusiek''” behartig. Wanneer daar egter in November 2005 gevind word dat hy resensies feitlik woordeliks uit ''Rolling Stone'' oorskryf en vertaal, word sy kontrak opgehef.<ref>Artikel in ''Rapport'' van 27 November 2005</ref> Hy is senior lektor in Filmmusiek aan die Suid-Afrikaanse Filmskool (AFDA) in Auckland Park en woon in Killarney in Johannesburg.