Prosus

Prosus NV is een van Europa se grootste internasionale maatskappye in die tegnologie- en internetbedryf.

Maatskappye

Prosus het onder andere belange in die volgende firma’s: die Russiese mediagroep Mail.ru Groep, die Suid-Afrikaanse betalingsplatform PayU, die voedselafleweraar Delivery Hero, iFood, Classifieds, OLX, Fintech, PaySense, Swiggy, Etail, eMag, Travle, C Trip. Ten tyde van sy beursgang het die Chinese internetbedryf Tencent 84% van Prosus se netto batewaarde verteenwoordig. Prosus besit 31.1% van die aandele van Tencent en dit is in 2001 gekoop vir $32 miljoen. By die vorming van Prosus was die waarde van die belegging in Tencent $131 miljard en het dit die grootste bydrae tot Prosus se wins gelewer. Prosus rig sy werksaamhede veral op China, Indië, Rusland, Oos- en Sentraal-Europa, Noord- en Latyns-Amerika, Suidoos-Asië, die Midde-Ooste en Afrika.

Bestuur

Die besturende direkteur is die Hollander Bob van Dijk en onder die direkteure is bekende Suid-Afrikaanse sakelui soos Koos Bekker, Ben van der Ross, Debra Meyer, Henk du Toit, Cobus Stofberg en Rachel Jafta. Die hoofkantor is gevestig in Hoofddorp in Nederland.

Geskiedenis

Die maatskappy het voorheen bekend gestaan as Myriad International Holdings. Naspers het sy buitelandse belange na Prosus oorgeplaas en sedert 11 September 2019 word aandele in Prosus op die Amsterdamse en Johannesburgse aandelemarkte verhandel. Op daardie dag het ‘n aandeel in Prosus €58.78 gekos en was die maatskappy op Shell en Unilever na die grootste maatskappy genoteer op die Amsterdamse effektebeurs. Naspers besit ‘n ¾ van die aandele in Prosus.

Bibliografie

• www.prosus.com
• www.newglobaltechgroup.com/en/home