Verdrag van Portsmouth

Met die Verdrag van Portsmouth, wat op 5 September 1905 op die Amerikaanse Vlootwerf Portsmouth in Kittery in die deelstaat Maine onderteken is, is die Russies-Japannese Oorlog van 1904−1905 formeel beëindig. Onderhandelinge tussen die Russiese Tsareryk en die Keiserryk Japan het tussen 6 en 30 Augustus plaasgevind waarby die Amerikaanse president Theodore Roosevelt as bemiddelaar opgetree het. Vir sy suksesvolle bemiddeling is die Nobelprys vir Vrede van 1906 aan Roosevelt toegeken.