Nowosibirsk: Verskil tussen weergawes

 

'''Nowosibirsk''' ([[Russies]]: Новосиби́рск) is die derde grootste stad in [[Rusland]] na [[Moskou]] en [[Sint Petersburg]] en die grootste stedelike nedersetting in Siberië met 'n bevolking van meer as 1,6 miljoen in 2019. Nowosibirsk, wat as setel van die gelyknamige administratiewe streek of oblast en as Siberië se industriële, wetenskaplike en kulturele sentrum dien, het sy stigting in 1893 aan die destydse grootskaalse uitbreiding van die Russiese Tsareryk se spoorwegnet te danke. 'n Brug van die Transsiberiese Spoorweg oor die Ob-rivier, wat hier byna een kilometer breed is, was die beginpunt van 'n vinnige stedelike groei. Tans is daar in die stadsgebied ses brûe oor die Ob.

Die huidige stad se bakermat was 'n klein nedersetting aan die Ob se linkeroewer, Kriwosjtsjekowo, wat as geskikte bouplek vir 'n spoorwegbrug geag is. In 1895 is die nuwe nedersetting ter geleentheid van tsaar Nikolaas II se troonbestyging ''Nowonikolajefsk'' genoem. Twee jaar later is die spoorwegbrug voltooi, en reeds in 1903 is stadstatus aan die snelgroeiende nedersetting toegeken. In 1926 is die stadsnaam gewysig na Nowosibirsk.