Govan: Verskil tussen weergawes

'''Govan''' (['gʌvən]; [[Skots-Gaelies]]: ''Baile a' Ghobhainn'') is 'n distrik, parogie en voormalige ''[[burgh]]'' (selfregerende munisipale entiteit) wat tans deel uitmaak van [[Glasgow]], [[Skotland]]. Dit is 2,5 myl (4 km) wes van die middestad teen die suidoewer van die Clyderivier en teenoor die monding van die Kelvinrivier en die distrik Partick geleë. Histories het dit deel uitgemaak van die graafskap Lanark.

[[Lêer:Govan Old Parish Church.jpg|duimnael|links|Belangrike argeologiese vondse soos die Govan-sarkofaag en die Govan-steenmonumente (waaronder die sogenaamde ''hogbacks'') word in Govan se ou parogiekerk vertoon]]

Volgens [[Middeleeue|Middeleeuse]] legendes het Konstantyn, 'n 7de eeuse koning van Strathclyde, in Govan 'n [[klooster]] volgens die reël van die Ierse sendeling Columbanus gestig. Gedurende die Middeleeue het 'n veerboot Govan met Partick verbind om in die seisoenale behoeftes van beesdrywers te voorsien. In die 18de en 19de eeu het tekstielmeule en steenkoolmynbou tot die vernaamste bedrywe gegroei. Hulle is in die vroeë 19de eeu verbygesteek deur skeepsbou.<ref>[http://www.bbc.com/news/uk-scotland-glasgow-west-24820573 ''BBC News, 5 November 2013 - Govan: A shipbuilding history. Besoek op 21 Mei 2017'']</ref>

 

Tot in die 19de eeu was Govan 'n betreklik klein nedersetting met rietdakhuise. Industrialisering en verstedeliking het met die vestiging van 'n skeepsboubedryf in Govan begin, en die inwonertal het van slegs sowat 2&nbsp;000 teen die begin van die 19de eeu tot 9&nbsp;000 in 1864 en nagenoeg 60&nbsp;000 teen die middel van die 1880's gestyg. Een van die nuwe ondernemings, ''Fairfield Shipbuilding and Engineering Company'', of ''Fairfield's'' soos dit meestal kortweg genoem is, het tot die grootste skeepswerf ter wêreld gegroei wat 5&nbsp;000 werkers in diens gehad het. ''Fairfield's'' het later met ander werwe saamgesmelt om in 1968 ''Upper Clyde Shipbuilders'' te vorm, maar sy kantoorgeboue het bewaar gebly.

{{clear}}

== Verwysings ==