Harare: Verskil tussen weergawes

'''Harare''' (voormalig, tot 1982 '''Salisbury''') is die [[hoofstad]] van [[Zimbabwe]]. Die stad is Zimbabwe se grootste en die land se administratiewe, kommersiële en kommunikasiemiddelpunt. Dit is 'n handelsentrum vir [[tabak]], [[mielie]]s, [[katoen]] en [[sitrus]]vrugte. Vervaardigingsbedrywe sluit [[tekstiel]]e, [[staal]] en [[chemiese stof|chemiese stowwe]] in. [[Goud]] word in die omgewing ontgin. Die bevolking is in 2009 op 1 606 000 beraam. Na ramings is sowat 'n derde van Zimbabwe se bevolking in die metropolitaanse gebied van Groter Harare saamgetrek. Groter Harare se bydrae tot die land se bruto binnelandse produk (BBP) word op sowat 40 persent beraam. Die informele sektor speel 'n uiters belangrike rol. So word beraam dat daagliks sowat een miljoen informele handelaars na Harare stroom om hul goedere daar te bemark.

Harare se stadsuitleg met breë lane, wat nog uit die Britse koloniale tydperk dateer, word as een van die mooiste van alle hoofstede in Afrika beskou. Dikwels word Harare as 'n duale of hibriede stad met drie hoofkomponente beskryf - die historiese middestad wat as sakekern dien en waar baie belangrike instellings en ondernemings hul hoofkantore het; die welgestelde voorstede in die noorde; en die minder welvarende residensiële buurte in die suide. Hulle is verderaf van die middestad geleë en bestaan grotendeels uit informele nedersettings. Koloniale owerhede en die blanke Rhodesiese bevolking het hierdie nedersettings deur middel van groen gordels van die middestad geskei. Terwyl volgens amptelike statistieke sowat 35 persent van Harare se bevolking in hierdie buurte gehuisves word, beraam deskundiges hierdie syfer op vyftig persent of meer.