Nok-kultuur

Die Nok-kultuur was ‘n beskawing wat tussen 400 v.C. en 200 n.C. in die sentrale deel van die huidige Nigerië bestaan het. Dit is teenswoordig veral bekend om sy terracota beeldjies met versamelaarswaarde.

Die Nok-mense het in hul gevestigde samelewing ‘n redelik hoë ontwikkelingspeil bereik en is die vroegste bewys van ‘n georganiseerde samelewing in Afrika suid van die Sahara. Hulle het in dorpies gewoon, landbou en veeteelt beoefen en klipwerktkuie gebruik. Vanaf ongeveer 500 n.C. het die mense die bewerking van yster baas geraak en wapens, plaasgereedskap en juweliersware begin maak. Vanuit hierdie gebied het die vaardigheid suidwaarts in Afrika versprei.

Die ongeglasuurde aardewerk beelde met ‘n bruinrooi kleur word beskou as die eerste kunswerke wat die suidelike deel van Afrika opgelewer het en word aanvaar as die bewys van die hoë kultuur se bestaan. Die bors- en standbeelde is hol en beeld gewoonlik mense uit wat sierade dra, maar ook beelde van diere en plante kom voor. Wat die doel van die beelde was, is onbekend. Waarskynlik het die beelde gestaan om grafte aan te dui of is gebruik as talismans in rituele seremonies by geboortes, troues en begrafnisse om die betrokkenes teen onheile soos misoeste, onvrugbaarheid en siektes te beskerm.

Bibliografie

• The Kingfisher illustrated history of the world – 40 000 BC to present day. Londen: Kingfisher Books, 1993. ISBN 0-86272-953-X