Poseidon: Verskil tussen weergawes

'''Poseidon''' ([[Grieks]]: Ποσειδῶν) was in die [[Griekse mitologie]] die [[god]] van die [[see]], [[Perd|perde]] en, as "Die Aardskudder", van [[Aardbewing|aardbewings]]. Hy is een van die twaalf [[Olimpiese gode]], maar het in ’n paleis onder die see gewoon. Poseidon het baie kinders gehad. Daar is ’n [[lofsang van Homerus]] aan Poseidon, wat die beskermheer van baie Hellenistiese stede was, hoewel [[Atena]] hom geklop het in die stryd om [[Athene]].

Poseidon het nuwe [[Eiland|eilande]] geskep en die see laat bedaar. As hy beledig of geïgnoreer is, het hy met sy drietandvurk op die grond geslaan en woeste [[Fontein|fonteine]], aardbewings, verdrinkings en die sink van bote veroorsaak. Matrose het tot Poseidon gebid vir ’n veilige vaart en het soms perde verdrink as ’n offerande.

In Griekse kuns ry hy ’n strydwa wat deur ’n [[hippokampus]] (seeperd) getrek word, of deur perde wat op die see kan hardloop. Sy simbole was die drietandvurk, [[vis]], [[dolfyn]], perd en [[Bees|bul]]. Hy het in ’n paleis op die seebodem gewoon wat van [[Koraal|korale]] en [[edelstene]] gemaak was.