Karima Brown

Karima Brown (1967 - 4 Maart 2021) was 'n Suid-Afrikaanse joernalis.

Brown is in Kaapstad gebore en het skoolgegaan aan die Hoërskool Soutrivier. Brown was die dogter van Achmat Semaar, 'n gemeenskapsleier in Mitchell's Plain en 'n ANC-aktivis. Sy volg hom na politieke aktivisme toe sy by die Cape Youth Congress en die South African Students Congress aansluit terwyl sy aan die Universiteit van Wes-Kaap studeer. Sy was later lid van die United Democratic Front.

Gedurende haar loopbaan as 'n gerespekteerde Suid-Afrikaanse joernalis was sy die politieke redakteur van Business Day, het sy die Karima Brown-program op Radio 702 aangebied, groepredakteur by Independent Newspapers en Forbes Women Africa van stapel gestuur. Onlangs het sy 'n aktualiteitsprogram op eNCA aangebied, genaamd The Fix. As lid van die ANC sowel as joernalis het sy af en toe kontroversie ontlok. Sy het in 2019 'n hofsaak teen die EFF gewen, nadat sy hulle gedagvaar het oor dreigende boodskappe wat sy ontvang het toe Julius Malema haar selfoonnommer op sosiale media gepubliseer het. Die hooggeregshof in Johannesburg het bevind dat die party die kieswet oortree, en Brown verwelkom die uitspraak as 'n “oorwinning vir mediavryheid, 'n oorwinning teen seksisme, en ['n oorwinning vir vroue in die joernalistiek en beskerming en vryheid van die media".

Sy sterf aan COVID-19 op 54-jarige ouderdom. Die Suid-Afrikaanse regering het haar hulde gebring en gesê dat 'haar bydrae tot die joernalistieke beroep en vreesloosheid in die uitvoering van haar werk baie gemis sal word.'