G.F. Angas

George French Angas (*Durham, Engeland, 24 April 1822 - †Londen, 8 Oktober 1886) was ‘n Britse en Australiese kunstenaar, reisiger, dierkundige en skrywer wat die Kaapkolonie en Natal in 1846-1847 besoek het.

In Suid-Afrika maak Angas tekeninge van die inheemse bevolking, veral van die Khoikhoi, Kaapse Maleiers en die Zoeloes, hul koning, sy krygsmanne, hul dorpies , gewoontes en lewenswyse sowel as waterverfskilderye van landskappe en tonele rondom Kaapstad, Durban, Wynberg, Genadendal, Paarl en Somerset-Wes. Hierdie kunswerke is van besondere kultuur-historiese belang vir Suid-Afrika.

Die oorspronklike sketese en skilderye is in die Parlemenstsbiblioteek in Kaapstad, die William Fehr-versameling in Rust-en-Vreugd, die Britse Museum en die Suid-Australiese Museum.

In 1849 het Angas ‘n boek gepubliseer getiteld The Kaffirs illustrated in a series of drawings taken among the Amazulu, Amapondo and Amakosa tribes, also portraits of the Hottentot, Malay, Fingo and other races inhabiting Southern Africa, together with sketches of landscape scenery in the Zulu country, Natal and the Cape Colony. Die boek het slegs 52 bladsye, is 55cm hoog en bestaan uit 30 groot litografieë en 11 gravures. Die litografieë is dikwels met die hand ingekleur.

Die boek het ‘n klein oplaag gehad en is ‘n kosbare besit van sekere Africana-biblioteke.

Bibliografie

• Gordon-Brown, A.: George French Angas. Artist, Traveller, and Zoologist. In: Lantern. Tydskrif vir Kennis en Kultuur. Jaargang 7, nr. 4, Junie 1958
• philographikon.com