King Kong

King Kong (1933) Dit is 'n spesiale-effekte-fliek wat die rolprentwese een van sy mees blywende ikonografiese beelde gegee het: die reuse-gorilla, King Kong, aan die bo-punt van die Empire State-gebou, wat die vliegtuie probeer wegklap wat hom wil doodmaak. Baie van dié effekte is deur model-animasie bereik.

Stop-beweging-fotografie het 'n agttien-duim-model, gemaak van pels, metaal en rubber, lewe gegee. Dit verteenwoordig 'n hoogtepunt in dié soort spesiale effek wat nog steeds die moeite werd is om na te kyk. 'n Latere weergawe van dié rolprent, wat in 1976 deur John Guillermin gemaak is, het die grimeerkunstenaar, Rick Baker, in 'n aappak gebruik. Dit het ook 'n meganiese aap wat ses-en-'n-halwe ton geweeg het en 40 voet die lug in getoring het, gebruik. Dié model het met 'n komplekse hidroliese stelsel gewerk en kon 15-voet-treë gee.

Hierdie weergawe van King Kong was egter 'n mislukking by die loket en die mees oortuigende aaptonele was dié van Baker in die kostuums.