Programmeerder

Rekenaarprogrameurs skep, wysig en toets die vorms, skripte en bronteks wat vir die rekenaar sê wat om te doen. Hulle dien as die skakel tussen die operateur en die rekenaar.

Die werk van rekenaarprogrameurs is beide veeleisend en belonend. In algemene terme is hulle mense wat programme skryf vir spesifieke doeleindes of behoeftes, soos 'n virtuele realiteitspeletjie, 'n databasisstelsel, beheer oor masjinerie, of om 'n onderneming se telefoonstelsel te programmeer.

Rekenaarprogrammeurs skryf programme, wat gedetailleerde instruksies is, wat die spesifikasies lys wat die rekenaar moet volg om 'n probleem op te los of om inligting in 'n logiese orde te verwerk. Stelselontleders verskaf die spesifikasies vir 'n spesifieke taak. Programmeurs skryf programme en vertaal dit in rekenaartale soos VISUAL BASIC, DELPHI, Pascal, Cobol, Java, Oracle, Informix, C en C++, onder andere. Die volgorde van instruksies word sekuur deur middel van die toetsbord ingevoer en gekontroleer om te verseker dat die instruksies korrek is en dat dit die gewenste inligting sal produseer. Indien foute deursypel, word die program gewysig en getoets totdat die gewenste resultaat bereik word.

Rekenaarprogrammeurs werk nou met stelselontleders om programme te produseer gebaseer op die behoeftes van die kliënt.

Die werk van rekenaarprogrammeurs behels die navorsing en dokumentering van rekenaargebruikers se verwagtinge, die ontleding van die einddoele en probleme wat deur die stelselontleder gespesifiseer word, en die vasstelling van watter stappe geneem moet word en in watter volgorde, gevolg deur die vertaling van hierdie stappe in rekenaartaalopdragte. Hulle toets programme en sagtewaretoepassings en ontgogga ("debug") dit dan. Hulle moet ook die wyse en beskrywing van die program se funksionering dokumenteer deur gebruiksaanwysings en helpskerms voor te berei.

Rekenaarprogrammeurs spesialiseer in 'n verskeidenheid gebiede:

• Netwerkprogrammeurs werk met kommersiële netwerktale om die implementering en wysiging van netwerkkonfigurasies te ondersteun.
• Databasisprogrammeurs is betrokke by die ontwikkeling van programme om die toegang en onderhouding van databasisse te pas.
• Ontlederprogrammeurs ontwerp en ontleed kliëntebehoeftes en skep ingewikkelde ontwerpstrukture vir vertaling in 'n programtaal.
• Multimediaprogrammeurs is betrokke by stelsels, toepassings en programmeringskwessies. Dit sluit in die verwisseling tussen platforms en die aanvanklike skryf van bronteks vir die inkorporering van teks, grafika, video, animasie, digitale/analoogfoto's, klank en 2/3D-modelle.
• Stelselsagtewareprogrammeurs skryf, onderhou en wysig programme wat die algehele funksionering van rekenaars beheer.