P. K. le Roux

Volle name: le Roux, Pieter Mattheus Kruger
Geboorte datum: 11 November 1904
Plek van geboorte: plaas Doornkraal, De Rust in die Oudtshoorn distrik
Gedoop: 15 Jan 1905 (De Rust: Doopboek 1; Nr 346)
Ouers: Gert Cornelis le Roux en Margaretha Albertha le Roux
Getroud: 26 Junie 1928 met Emily Hobhouse Schoeman,dogter van wyle mnr. J Schoeman
Kinders: een seun en twee dogters
Liefhebberye: Tennis en boerdery
Interessantheid: Sy oorspronklike geboortedatum was aangeteken as 11 Des 1904, maar op 9 Julie 1945 is die geboortedatum in die doopregister verander na 11 Nov 1904 volgens toestemming verleen deur die Kerkraad (Kerkraadsnotule, bl. 23.)

Hy ontvang opleiding aan Hoerskool Outeniqua. Vanaf 1922 tot 1923 studeer hy B.Sc (Landbou) aan die Universiteit van Stellenbosch. Na sy universitere opleiding gaan hy boer. Hy stel besonder belang in openbare boerderyaangeleenthede. Hy was die stigter en voorsitter van die Klein Karoo Landboukooperasie te Oudtshoorn. Hy word lid van die plaaslike boerevereniging en dien op die Suidwestelike Landbou unie, op die SA Landbou-unie se bestuur en as direkteur van die Kango-Tabakkooperasie. Hy was ook lid van die Sentrale Tabakraad, Tabakbeheerraad en ander lanbou rade. Weens ‘n hoë werkslas en veelvoudige belange moes hy hom later ontrek aan sommige verpligtinge soos byvoorbeeld direkteur van verskillende private en publieke sakeondernemings. Van jongs af stel hy aktief belang in politiek en begin as sekretaris van die NP tak op De Rust. In 1942 met die tussenverkiesing te Riversdal stel hy hom vir die eerste keer verkiesbaar, en word verkies tot lid van die Volksraad (LV) vir die Herenigde Nasionale Party. In 1943 verkiesing bestry hy die Bredasdorp-setel vir die Herenigde Nationale Party maar verloor dit. Hy gaan boer vir vyf jaar. In 1948 word hy verkies tot lid van die Volksraad (LV) vir Victoria-Wes, welke kiesafdeling in 1953 deur die Afbakeningskommissie tot Prieska verander is en as sodanig deur hom verteenwoordig word. In 1953 word hy Provinsiale Sweep vir die Nationale Party in Kaapland en in 1955 Hoofsweep. In 1958 behou hy die Oudtshoorn-kiesafdeling vir die NP. In Mei 1958 word hy opgeneem in die Kabinet as Minister van Landbou en op 23 Oktober 1958 volg hy P.O Sauer op as Minister van Waterwese (bykomende portefeulje). Met die verkiesing van dr. HF Verwoerd as Eerste Minister in 1961 is die portefeuljes Landbou-Tegniese Dienste en Waterwese aan hom toe vertrou. Hy word in 1966 opgevolg deur J J Fouche.

Die Vanderkloof-dam was na hom vernoem en het bekend getaan as die PK le Roux-dam.