Vyf Pilare van die Islam: Verskil tussen weergawes

Islam beteken die wil of wet van Allah soos wat hy dit aan die mensdom geopenbaar het deur die profete en spesifiek deur die "laaste profeet" - [[Mohammed]]. 'n Moslem is iemand wat hom of haar aan die wil van Allah onderwerp en leef soos Allah dit verwag. In die praktyk is daar vyf "moets" waarvolgens 'n Moslem moet leef om só die ewige lewe in die Paradys te verdien. Dit staan bekend as die vyf pilare van [[Islam]].

Die eerste en belangrikste pilaar van Islam is die [[belydenis]] van geloof. Dié belydenis - "La ilaha illa Allah, Muhammadun rasoola Allah" (Daar is geen ware God behalwe Allah nie, en Mohammed is die Boodskapper van God) is 'n samestelling uit twee afsonderlike gedeeltes in die Koran en deur dit te sê, verwerp die Moslem enige ander god behalwe Allah en verklaar dat hy daarom alleen waardig is om aanbid te word.

Die belydenis moet minstens een keer in elke Moslem se lewe in die openbaar gedoen word. 'n Goeie Moslem herhaal die belydenis egter van kleins af 'n paar keer per dag en duisende kere deur sy of haar lewe tot met die dood.

Selfs op sy of haar sterfbed is dit 'n Moslem se begeerte om met die belydenis op die lippe te sterf en indien die sterwende dit nie self kan sê nie, word dit saggies deur die familie of vriende in die sterwende se oor gefluister.

Wanneer iemand hom of haar tot Islam bekeer, is die belangrikste voorwaarde of ritueel dat die persoon die belydenis met oortuiging moet sê.

Die tweede pilaar van Islam is gebed, wat gesien word as direkte kommunikasie tussen die Moslem-gelowige en Allah. Moslems [[bid]] minstens vyf keer per dag - voor sonsopkoms, in die voormiddag, teen laatmiddag, net nadat die son gesak het en weer in die laataand net voor slaaptyd.

Gebede word meestal gesamentlik gedoen, maar 'n individu kan ook op sy of haar eie bid. Voor elke gesamentlike gebed by die moskee word die gelowiges amptelik hardop deur die muezzin geroep om te gaan bid.

Op Vrydagmiddae kom gelowiges ook by die moskee byeen vir 'n spesiale gebedstyd. Dié gebed word gewoonlik voorafgegaan deur 'n boodskap of preek deur die imam. Spesiale oggendgebedsbyeenkomste word in die buitelug gehou aan die einde van die Ramadan-vastyd en ná die terugkeer van die pelgrimstog na Mekka.

In sommige lande word vroue toegelaat om in die moskee te bid, maar hulle doen dit in 'n vertrek apart van die mans. In ander lande bid vroue by die huis.

In Mohammed se tyd is belasting deur die regering van die rykes gevorder om armes daarmee te help. Hoewel hierdie gebruik intussen selfs in die meeste Moslem-lande verval het, word daar steeds van Moslems verwag om 'n deel van hul inkomste of besittings aan liefdadigheid te skenk. Dié bydrae, wat zakat genoem word, is die derde pilaar van Islam.

Die doel van die bydrae is nie net om die armes in die gemeenskap hiermee te help nie, maar die gelowige kry ook voordeel daaruit. Moslems glo dat hul besittings gereinig word wanneer hulle 'n deel daarvan as zakat weggee en dat hulle meer sal ontvang omdat hulle bereid is om daarvan weg te gee.

Die vierde pilaar van Islam is om gedurende die maand van [[Ramadan]] van sonop tot sonsondergang te vas. In dié tyd weerhou alle Moslems, behalwe siekes, swakkes en swanger vroue, hulle van kos, drank, rook en seksuele omgang.

Die doel van die vastyd is enersyds om die tyd te herdenk toe Mohammed sy eerste openbaring ontvang het; andersyds is dit ook 'n tyd van geestelike selfreiniging en oordenking.

Aan die einde van elke dag se vastyd tydens Ramadan word die vas gewoonlik gebreek deur 'n gesamentlike feesmaal vir familie en vriende.

Die vyfde pilaar van Islam - en waarskynlik die een met die meeste aansien - is die pelgrimstog na Mekka. Hoewel die pelgrimstog nie vir elke Moslem beskore is nie, word dit van elkeen vir wie dit finansieel en fisiek moontlik is, verwag om minstens een keer in sy of haar lewe die reis na Mekka aan te pak. Sommige rykes, soos die koning van [[Saoedi-Arabië]] en sy familie, onderneem die pelgrimstog jaarliks.

Die pelgrimstog word oor die eerste twaalf dae van die twaalfde maand van die Islamitiese jaar gehou. Manlike pelgrims dra twee stukke soomlose materiaal (simbolies van alle mense se gelykheid voor God) terwyl vroue hul gewone klere dra, maar van kop tot tone heeltemal bedek is.