Sodoende is die legioene in ’n kilometers lange stoet uitgerek en kon hulle nie in hul normale, haas onoorwinlike slagordes veg nie. Op 9 September het die Germane met ’n reeks aanvalle begin, en in die daaropvolgende drie dae is die Romeine stelselmatig en wreed stuk vir stuk afgeslag totdat hulle uitgewis is.
Vir Augustus, al oud, was dit ’n klap waarvan hy nooit herstel het nie. Die Romeinse skryver Suetonius het ’n toneel opgeteken waar Augustus wanhopig uitroep: Quintili Vari, legiones redde! (“Quintilius Varus, gee terug my legioene!”)
Die Romeine het weliswaar ’n paar jaar later wraak geneem deur nog ’n inval onder leiding van Germanicus waarin die Germane verslaan is, maar dit was die einde van alle permanente uitbreidingsplanne. Die Ryn het die vaste grens geword.
In die gebiede wat onder Romeinse beheer geval het, het twee taal- en kultuurontwikkelings plaasgevind. In die ooste het Grieks die omgangstaal geword, en dit sou so bly totdat dit in die loop van die Middeleeue deur Arabies vervang is. In die weste het Latyn die taal geword, maar mettertyd het dit in verskillende streke ontwikkel tot wat ons vandag ken as Italiaans, Frans, Spaans en Portugees.
Buite die Romeinse Ryk het Germaanse tale ontwikkel tot Duits, Nederlands en die Skandinawiese tale. Op dié manier het Europa kultureel in twee uiteenlopende rigtings ontwikkel.
[[Gebruiker:Arthurcox|Arthurcox]] ([[Gebruikerbespreking:Arthurcox|kontak]]) 18:49, 27 Maart 2011 (UTC)
