Stellaland

Die Stellalandse Republiek was vanaf 1882 tot 1885 'n onafhanlike gebied in die noordelike deel van die destydse Kaapkolonie en nou deel van Suid-Afrika.

Die republiek het ontstaan nadat Boere betrokke geraak het by 'n konflik tussen twee swart stamme, die Batlaping en die Korannas. Albei groepe het wit huursoldate gewerf. David Massouw, die leier van die Korannas, het aan die Boere plase beloof. Toe die konflik in Julie 1882 beëindig is, het 416 van die Boere wat plase ontvang het, hulleself as vryburgers beskou en Stellaland as hulle eie onafhanklike republiek uitgeroep. G.J. van Niekerk was die eerste (en enigste) president van die republiek wat in Augustus 1883 formeel geproklameer is.

Vryburg, die hoofdorp, is uitgelê op 'n plek wat die Tswanas as Huhudi (Tswana vir "lopende water") ken.

Die naam kom van Stella, die Latynse woord vir ster. Daar is ook 'n dorp met die naam Stella naby Vryburg. Daar was blykbaar 'n komeet in die nagruim sigbaar tydens die gevegte.

In 1885 het die Britte die dorp ingeneem en die gebied by Brits-Betsjoenaland ingelyf, wat toe in 1895 deel van die Kaapkolonie geword het. In 1910 het die Kaapkolonie die Kaapprovinsie (een van die vier provinsies van die Unie van Suid-Afrika en later die Republiek van Suid-Afrika) geword. Vanaf 1994, toe die land in nege provisies ingedeel is, is hierdie gebied deel van die Noordwes-provinsie van Suid-Afrika.