Vasco (kiesafdeling)

Vasco was in 1943 die eerste van die uiteindelik vyf kiesafdelings vir die Suid-Afrikaanse Volksraad wat mettertyd afgebaken is in wat later sou bekend staan as Kaapstad se Noordelike Stadsgebiede.

Genl. Jan Smuts gesels met lede van sy kabinet, sen. A.M. Conroy, James Wellwood Mushet (LV vir Liesbeek van 1920 tot 1921, Maitland van 1938 tot 1943 en Vasco van 1943 tot 1953), Jannie Hofmeyr en Frederick Sturrock, in 1946.

In die eerste verkiesing wen James Mushet van die Verenigde Party, voorheen LV vir Liesbeek van 1920 tot 1921 en Maitland (wat tydelik voor 1943 se verkiesing afgeskaf is) van 1938 tot 1943, met 1 671 stemme teen die Herenigde Nasionale Party se D.J.J. Mostert. In 1948 krimp sy meerderheid teen die N.P. se B.J.J.J. van Rensburg tot net 185 stemme. Op 4 Maart 1953 tree Mushet uit as LV en in die verkiesing daardie jaar wen die Nasionale Party se dr. Karl Bremer met 1 217 stemme teen die V.P. se J. de Villiers. Bremer was ook LV vir Graaff-Reinet van 1924 tot 1925 en 1929 tot 1943, Stellenbosch van 1943 tot 1948 en Ceres van die tussenverkiesing op 2 Mei 1951 tot 1953.

Bremer sterf egter kort na die verkiesing op 18 Julie 1953 en in die tussenverkiesing op 4 November 1953 word dr. A.J.R. (Albertus) van Rhijn met 'n meerderheid van 1 702 vir die N.P. teen die V.P. se De Villiers verkies. In die algemene verkiesing van 1958 vergroot Cornelius Valkenburg de Villiers die N.P. se meerderheid tot 2 308 teen die V.P. se J.E.C. Beck. De Villiers was LV vir Valsbaai van 1953 tot 1958.

In die volkstemming van 1960 stem 7 138 kiesers in Vasco vir republiekwording en 4 119 daarteen. De Villiers word dan ook onbestrede herkies in die verkiesing die volgende jaar toe tientalle setels landswyd nie betwis is nie. In 1966 stel die V.P. weer 'n kandidaat, J.W. van Eeden, maar hy kry net 2 473 stemme vergeleke met die nuwe LV, Petrus Hendrik Meyer se 6 377 vir 'n meerderheid van 3 904. In 1970 word Meyer onbestrede verkies, maar in 1974 staan die V.P. se R.V. Carlisle teen hom en kry 2 860 stemme, 'n meerderheid vir Meyer van 3 806.

In 1977, 1981, 1987 en 1989 het die N.P. telkens Vasco behou.

Sien ook

Bellville, Claremont, Constantia, De Kuilen, Durbanville, Groenpunt, Groote Schuur, Kaapse Vlakte, Kaapstad-Hawe, Kaapstad-Kasteel, Kaapstad-Sentraal, Kaapstad-Tuine, Liesbeek, Maitland, Mowbray, Nuweland, Parow, Pinelands, Rondebosch, Seepunt, Simonstad, Soutrivier, Suid-Skiereiland, Tygervallei, Woodstock, Wynberg

Bronne

• Potgieter, D.J. (red.) 1972. Standard Encyclopaedia of Southern Africa. Cape Town: Nasionale Opvoedkundige Uitgewery (Nasou).
• Schoeman, B.M. 1977. Parlementêre verkiesings in Suid-Afrika 1910-1976. Pretoria: Aktuele Publikasies.