Akantrom
Die Akantrom is ’n trom wat in Wes-Afrika gemaak en later in Noord-Amerika ontdek is. Dit is nou die oudste Afro-Amerikaanse voorwerp in die Britse Museum en moontlik ter wêreld.[1] Die trom is ’n herinnering aan Afrika, Noord-Amerika en Europa se betrokkenheid by die geraamde 12 miljoen mense wat as deel van die slawehandel oor die Atlantiese Oseaan vervoer is.[2] Die trom word gewoonlik in kamer 26 vertoon.[1][3]
Beskrywing wysig
Die trom is gemaak van twee stukke hout wat inheems aan Afrika suid van die Sahara is, Baphia en Cordia africana. Laasgenoemde is ’n loofhout met ’n fyn grein wat bekend is vir sy vermoë om gegraveer te word en vir sy resonansie, en dit is dus ideaal vir die maak van musiekinstrumente.[4] Die vel van die trom is dié van ’n takbok.
Die trom is tussen 1700 en 1745 in die Ghanastreek van Wes-Afrika gemaak en is vermoedelik aan boord van ’n slaweskip na Amerika gebring. Omdat slawe niks by hulle gehad het nie, word vermoed dit is saamgebring deur óf ’n bemanningslid óf moontlik die seun van ’n Afrikahoofman wat die slawe vir sy vervoer verkoop het.[5] Om die gevange slawe oefening te gee, is hulle laat dans, en dit is moontlik die rede hoekom die trom op die skip was.[5] Die woord "Akan" verwys na die kultuur in wat vandag Ghana is en sluit in die Fante, Asante en Akuapem.[1]
Die trom is gekoop vir die versamelaar sir Hans Sloane, wat gedink het dit is deur inheemse Amerikaners gemaak. Sloane het voorbeelde van slawe se instrumente bymekaargemaak en dit het dié trom ingesluit. Sloane het sy versameling gebruik om die Britse Museum in 1753 te stig en die trom word steeds daar uitgestal as deel van die Sloaneversameling.
In 1906 het kurators van die Britse Museum besef dit kan nie deur inheemse Amerikaners gemaak gewees het nie en in die 1970's is vasgestel die hout kom uit Afrika.[5]
Die trom was te sien in A History of the World in 100 Objects, ’n reeks radioprogramme wat in 2010 begin het danksy die samewerking tussen die BBC en die Britse Museum.[5]
Verwysings wysig
- ↑ 1,0 1,1 1,2 "Ancient African drum on display at British Museum" (in Engels). Mpelembe Network. Geargiveer vanaf die oorspronklike op 5 Oktober 2016. Besoek op 26 September 2010.
- ↑ "Akan Drum". A History of the World in 100 Objects (in Engels). BBC. Geargiveer vanaf die oorspronklike op 22 Oktober 2019. Besoek op 26 September 2010.
- ↑ British Museum, The drummer is calling me display.
- ↑ Cunningham, A.B. (2005). Carving out a future: forests, livelihoods and the international woodcarving... p201. p. 293.
- ↑ 5,0 5,1 5,2 5,3 "Akan Drum" (in Engels). British Museum. Geargiveer vanaf die oorspronklike op 19 Oktober 2015. Besoek op 26 September 2010.
Skakels wysig
Hierdie artikel is in sy geheel of gedeeltelik uit die Engelse Wikipedia vertaal.
